ვენესუელელი დემოკრატიული აქტივისტი მარია კორინა მაჩადო და პრეზიდენტად არჩეული გონსალესი მშვიდობიანად გამოხატავენ ხალხის ნებას, - ამის შესახებ აშშ-ის არჩეული პრეზიდენტი, დონალდ ტრამპი სოციალურ ქსელში წერს.

მისი თქმით, ისინი უსაფრთხოდ უნდა იყვნენ.

“ვენესუელელი დემოკრატიული აქტივისტი მარია კორინა მაჩადო და პრეზიდენტად არჩეული გონსალესი მშვიდობიანად გამოხატავენ თავიანთ ხმასა და ვენესუელელი ხალხის ნებას, ხოლო ასობით ათასი ადამიანი რეჟიმის წინააღმდეგ მართავს დემონსტრაციებს. ვენესუელელი ამერიკელების დიდი საზოგადოება შეერთებულ შტატებში აბსოლუტური უმრავლესობით მხარს უჭერს თავისუფალ ვენესუელას და მყარად დამიჭირა მხარი მე. ეს თავისუფლებისთვის მებრძოლები არ უნდა დაშავდნენ, უნდა დარჩნენ უსაფრთხოდ და ცოცხლები!”, - წერს ტრამპი.

ცნობისთვის, აშშ-ის სახელმწიფო მდივანმა ენტონი ბლინკენმა დღეს გამოაცხადა, რომ აშშ არ აღიარებს ნიკოლას მადუროს დღევანდელ “არალეგიტიმურ საპრეზიდენტო ინაუგურაციას” და ვაშინგტონი “მზად არის მხარი დაუჭიროს ვენესუელაში დემოკრატიის დაბრუნებას”. მან ასევე აღნიშნა, რომ სახელმწიფო დეპარტამენტმა 25 მილიონ აშშ დოლარამდე გაზარდა ჯილდო ინფორმაციისთვის, რომელიც მადუროს და მისი შინაგან საქმეთა მინისტრის დაპატიმრებამდე და/ან გასამართლებამდე მიიყვანს.