თეთრიწყაროს რაიონული სასამართლოს მოსამართლე ვლადიმერ ხუჭუა აცხადებს, რომ ის რესტორან “ბაბილოში“ მოსამართლეების კორპორაციული წვეულებაზე არ მიიწვიეს.

როგორც მან განმარტა, აღნიშნული ქმედებით მას "არაფერი დააკლდება", დამატებით დეტალებსა და გარემოებებზე ვერ ისაუბრებს, რადგან ქართველი მოსამართლის ღირსებას და პრესტიჟს უფრთხილდება.

„ვადასტურებ, რომ არ ვიყავი მიწვეული კორპორაციულ წვეულებაზე. არავის ჰქონია ჩემთან აღნიშნულის თაობაზე კომუნიკაცია. ეს არ არის პირველი შემთხვევა, როდესაც მსგავს შეხვედრებზე არ ვარ მიწვეული. მინდა, კიდევ ერთხელ განვაცხადო, რომ ამით მე არაფერი დამაკლდება. სხვა დეტალებსა და ნიუანსებზე არ მსურს საუბარი, ჩემთვის მთავარია გავუფრთხილდე სასამართლოს პრესტიჟს, ქართველი მოსამართლის ღირსებას და ასევე პრესტიჟს. მე არ გამკვირვებია ზოგი მოსამართლის მხრიდან ჩემი მისამართით არაკორექტული ქმედებები, წინა წლებშიც იყო მსგავსი რამ. მე არაფერი მაკლდება, არ ვსაუბრობ სხვა რაიმე დეტალებზე მხოლოდ იმის გამო, რომ ქართველი მოსამართლის ღირსებას და პრესტიჟს გავუფრთხილდე“,- აღნიშნა ხუჭუამ.

ცნობისთვის, თბილისში, რესტორან “ბაბილოსთან” საპროტესტო აქცია მიმდინარეობს. რესტორანში მოსამართლეებისთვის კორპორაციული წვეულება მიმდინარეობს. აქციის მონაწილეებს თან მიტანილი აქვთ იმ ადამიანების ფოტოსურათები, რომლებიც გასულ კვირებში აქციების დროს დაზარალდნენ ან სამართალდამცველებმა დააკავეს.