„ბათუმელების“ რედაქტორის, ნანა კვაჭაძის განცხადებით, „ბათუმელებისა“ და „ნეტგაზეთის“ დამფუძნებლის, მზია ამაღლობელისთვის პატიმრობის შეფარდება „პოლიტიკური, რუსული გადაწყვეტილებაა“.

როგორც კვაჭაძემ სასამართლო სხდომის შემდეგ ჟურნალისტებს განუცხადა, დღეს დაპატიმრებულია ქალი, რომელმაც საქართველოში მაღალი რეპუტაციის მქონე მედიასაშუალება შექმნა.

„ქალი, რომელმაც შექმნა საქართველოში ერთ-ერთი საუკეთესო და მაღალი რეპუტაციის მქონე მედიასაშუალება, დღეს არის დაპატიმრებული. პატიმრობაში დატოვების არანაირი საჭიროება არ არსებობდა, მაგრამ ეს იყო პოლიტიკური, ეს იყო რეჟიმის, ეს იყო რუსული გადაწყვეტილება“,- განაცხადა ნანა კვაჭაძემ.

ინფორმაციისთვის, ბათუმის საქალაქო სასამართლომ „ბათუმელებისა“ და „ნეტგაზეთის“ დამფუძნებელს, მზია ამაღლობელს აღკვეთის ღონისძიების სახით პატიმრობა შეუფარდა. გადაწყვეტილება მოსამართლე, ნინო სახელაშვილმა მიიღო.

ამ დროისთვის, ბათუმის სასამართლოსთან აქცია იმართება. პროტესტს მედიის წარმომადგენლებთან ერთად პოლიტიკოსები და უფლებადამცველებიც შეუერთდნენ.

მზია ამაღლობელს ბრალი სისხლის სამართლის კოდექსის 353-ე პრიმა მუხლით აქვს წაყენებული, რაც პოლიციელზე თავდასხმას გულისხმობს. მზია ამაღლობელი, ბათუმში, პოლიციის მთავარ სამმართველოსთან აქციის დროს თავდაპირველად ადმინისტრაციული წესით დააკავეს, დაახლოებით ორ საათში გამოუშვეს. გათავისუფლებიდან რამდენიმე წუთში კი, ის სამმართველოსთან კვლავ დააკავეს.