„მრავალეროვანი საქართველო“- საქართველოს ჟურნალისტური ეთიკის ქარტიამ POSTV-ის მიერ ეთიკის დარღვევა დაადასტურა

საერთო-სამოქალაქო მოძრაობა „მრავალეროვანი საქართველო“ მიესალმება საქართველოს ჟურნალისტური ეთიკის ქარტიის საბოლოო გადაწყვეტილებას, რომელმაც POSTV-ს მიერ ეთიკური სტანდარტების დარღვევა საჯაროდ დაადასტურა,- ამის შესახებ ინფორმაციას „მრავალეროვანი საქართველო“ ავრცელებს.

ორგანიზაციის შეფასებით, ეს გადაწყვეტილება მნიშვნელოვანია მედიის ანგარიშვალდებულების გაზრდის პროცესში.

„ქარტიის განხილვამ აჩვენა, რომ POSTV-ს მასალები არღვევდა ეთიკური ჟურნალისტიკის არაერთ პრინციპს, მათ შორის გადაუმოწმებელი ინფორმაციის გავრცელებას და დისკრიმინაციული ნარატივების გამოყენებას. აღნიშნული ქმედებები ხელს უშლის ჟურნალისტური საქმიანობის სანდოობას და აძლიერებს საზიანო სტერეოტიპებს, რაც საზოგადოებას კიდევ უფრო პოლარიზებულს ხდის. ქარტიის გადაწყვეტილება ხაზს უსვამს ზუსტი და მიუკერძოებელი გაშუქების მნიშვნელობას, განსაკუთრებით პოლიტიკურად მგრძნობიარე საკითხებში.

„მრავალეროვანი საქართველო“, როგორც ორგანიზაცია, რომელიც მუშაობს ინკლუზიურობის ხელშეწყობასა და დეზინფორმაციის წინააღმდეგ ბრძოლაზე, აღნიშნავს, რომ ეს გადაწყვეტილება მნიშვნელოვანია მედიის ანგარიშვალდებულების გაზრდის პროცესში. მოვუწოდებთ მედიასაშუალებებს, დაიცვან ეთიკური სტანდარტები და ხელი შეუწყონ სოციალურ თანხმობასა და საზოგადოების ერთიანობას“, - აღნიშნულია განცხადებაში.

დამატებითი ინფორმაციისთვის, გთხოვთ, იხილოთ ბმული.