ეს არის მცდელობა, დანერგონ შიში. მცდელობა, რომ ვიღაცას გაუმყარონ რაღაც მოსაზრებები, რომ ვიღაცა არის ძლიერი. მაშინ, როდესაც ასეთი მოქმედება გჭირდება, ძალის დემონსტრირების სახით, ეს მიანიშნებს მხოლოდ და მხოლოდ სისუსტეზე, - ამის შესახებ საზოგადოებრივი მაუწყებლის საინფორმაციო გამოშვების წამყვანმა ვასილ ივანოვ-ჩიქოვანმა საქართველოს პარლამენტის უკანა შესასვლელთან, „ბათუმელებისა“ და „ნეტგაზეთის“ დამფუძნებლის, მზია ამაღლობელის მიმართ სოლიდარობის მორიგ აქციაზე განაცხადა.

მისივე თქმით, მზია ამაღლობელის შემთხვევაში საქმე გვაქვს სამართლებრივ უწესრიგობასა და უსამართლობასთან.

„მზია ამაღლობელი იმ ქმედებებისთვის არის დაპატიმრებული, რომელიც შეიძლება შეფასდეს, რომ არ იყო თავდასხმა. სააპელაციო სასამართლომ საერთოდ დაუშვებლად ცნო საჩივარი, სადაც საჩივრდებოდა მისთვის პატიმრობის სახით შეფარდებული აღკვეთის ღონისძიება, მაშინ, როდესაც სახალხო დამცველის მხრიდან არსებობს „მოსამართლის მეგობრის“ პოზიციაც, სადაც იგი საუბრობს, რომ პატიმრობის შეფარდება არ არის დაუსაბუთებელი და უნდა იყოს გამოყენებული უფრო მსუბუქი აღკვეთის ღონისძიება. ჩემი შეფასებით, საქმე გვაქვს სამართლებრივ უწესრიგობასთან, ასევე საქმე გვაქვს უსამართლობასთან. აუცილებელია, რომ ამას ჩვენ, საქართველოს მოქალაქეები წინ აღვუდგეთ“, - განაცხადა ვასილ ივანოვ-ჩიქოვანმა.