ბელარუსის პრეზიდენტის, ალექსანდრე ლუკაშენკოს განცხადებით, ეუთო/ოდირს თავად არ სურდა ბელარუსში ჩასვლა და საპრეზიდენტო არჩევნებზე დაკვირვება.

“უბრალოდ არ გინდოდათ ჩამოსვლა. არავისთვის აგვიკრძალავს ბელარუსში შემოსვლა“, - განაცხადა ლუკაშენკომ მინსკში ჟურნალისტებთან საუბრისას, როდესაც საპრეზიდენტო არჩევნებზე ეუთო/ოდირის დამკვირვებლების არ ყოფნის შესახებ დასმულ შეკითხვას უპასუხა.

მისი მტკიცებით, ეუთო/ოდირს მიწვევა გაუგზავნეს, თუმცა მათ განაცხადეს, რომ გაგზავნა დაგვიანებული იყო. ამასთან დაკავშირებით, ლუკაშენკომ აღნიშნა, რომ არსად არ არის დაკონკრეტებული როდის უნდა მოხდეს მიწვევა, გუშინ, დღეს თუ ხვალ.