ნებისმიერი სახის ქმედება, რომელიც „ქართულ ოცნებას“ დისკომფორტს უქმნის, კრიმინალიზდება. ანუ ყველა ქმედებაზე ითხოვენ კანონმდებლობაში ცვლილებების შეტანას, - ამის შესახებ „ძლიერი საქართველოს“ ერთ-ერთმა ლიდერმა, ლანა გალდავამ განაცხადა, რითაც შეკრება-მანიფესტაციებთან, ასევე ადმინისტრაციულ და სისხლის სამართლებრივი პასუხისმგებლობის გამკაცრებასთან დაკავშირებული საკანონმდებლო ცვლილება შეაფასა.

როგორც გალდავამ „პალიტრანიუსის“ გადაცემაში „რეზიუმე“ აღნიშნა, „ქართული ოცნების“ მიზანია „რეპრესიული ღონისძიებები აამოქმედოს“.

„ყველა ცვლილება, რაც ბოლო ორი წლის განმავლობაში კანონმდებლობაში შედის, რეპრესიულ მიზანს ემსახურება. ის ცვლილებები, რაც დღეს დაანონსდა ზღუდავს გამოხატვის თავისუფლებას. კონსტიტუციით გვაქვს უფლება თავისუფლად შევიკრიბოთ, გამოვხატოთ ჩვენი პოზიციები, ეს არის აღიარებული უფლება, რომელსაც მოქალაქეები მიმართავენ იმისთვის, რომ თავისი განსხვავებული პოზიციები დააფიქსირონ. „ქართული ოცნების“ წიაღში წინა ხელისუფლების მავნე პრაქტიკის გათვალისწინებით, მოხდა დუბლირება იგივე ქმედებების, რასაც ისინი სჩადიოდნენ, განსაკუთრებით, ბოლო ჟამის განმავლობაში.

ნებისმიერი სახის ქმედება, რომელიც „ქართულ ოცნებას“ დისკომფორტს უქმნის, კრიმინალიზდება ანუ ყველა ქმედებაზე ითხოვენ კანონმდებლობაში ცვლილებების შეტანას. ამით უნდათ რეპრესიული ღონისძიებები აამოქმედონ“, - განაცხადა გალდავამ.

ამასთან, გალდავა დასძენს, რომ ხელისუფლების მიზანია, ადამიანები დააშინონ, რათა ქუჩაში არ გამოვიდნენ.

„ეს არის ადამიანების დაშინების მცდელობა. მცდელობა იმისათვის, რომ იქნებ, ხალხი ქუჩაში არ გამოვიდეს, ხალხმა არ დაიცვას თავისი კონსტიტუციური უფლება. მე ვეუბნები მათ, რომ წარსული გამოცდილება კარგად გაითვალისწინონ, მათ შორის იმ ადამიანებმა, რომლებიც წინა ხელისუფლების წიაღში იყვნენ“, - აღნიშნა გალდავამ.