მამუკა ხაზარაძე - აშშ-მ უნდა განახორციელოს ზეწოლა „ქართული ოცნების“ არალეგიტიმურ, პროირანულ და პროჩინურ რეჟიმზე, რათა დაიცვას თავისი გეოპოლიტიკური ინტერესები შავი ზღვის რეგიონში
აშშ-მ უნდა განახორციელოს ზეწოლა „ქართული ოცნების“ არალეგიტიმურ, პრო-ირანულ და პრო-ჩინურ რეჟიმზე, რათა დაიცვას თავისი სასიცოცხლო ეკონომიკური და გეოპოლიტიკური ინტერესები შავი ზღვის რეგიონშიც, - ამის შესახებ „ძლიერი საქართველოს“ ლიდერი, მამუკა ხაზარაძე „ფეისბუქის“ გვერდზე წერს.
მისი თქმით, პანამას შემთხვევა ნათლად აჩვენებს, თუ როგორი წარმატებული შეიძლება იყოს ტრამპის ახალი ადმინისტრაციის მიერ განხორციელებული ზეწოლა აშშ-ს ეროვნული ინტერესების დაცვის თვალსაზრისით.
„სრულიად ვეთანხმები კონგრესმენ უილსონს, რომ საქართველო ცენტრალური აზიიდან კრიტიკულად მნიშვნელოვანი მინერალებისა და დედამიწის იშვიათი მეტალების ძირითადი სატრანზიტო გზაა და ამ სავაჭრო გზაზე ჩინეთის, ირანის და რუსეთის რეჟიმების ბატონობა არ უნდა იქნას დაშვებული, როგორც ეს ივანიშვილის თვითმარქვია რეჟიმის დროს ხდება.
ანაკლიის ღრმაწყლოვანი პორტი, რომელსაც შეუცვლელი ღირებულება გააჩნია საქართველოს კეთილდღეობისა და უსაფრთხოებისთვის, იქნება შუა დერეფნისა და რეგიონული შეკავშირების კრიტიკულად მნიშვნელოვანი ნაწილი.
სამწუხაროდ, ივანიშვილმა შეაჩერა პროექტი ამერიკული ინვესტიციებით და ის ჩინეთის კომუნისტური პარტიის მიერ კონტროლირებად კორუმპირებულ და სანქცირებული კომპანიას გადასცა, რაც საფრთხეს უქმნის როგორც საქართველოს, ასევე აშშ-ს ინტერესებს.
პანამას შემთხვევა ნათლად აჩვენებს, თუ როგორი წარმატებული შეიძლება იყოს ტრამპის ახალი ადმინისტრაციის მიერ განხორციელებული ზეწოლა აშშ-ს ეროვნული ინტერესების დაცვის თვალსაზრისით.
პანამას მსგავსად, აშშ-მ უნდა განახორციელოს ზეწოლა „ქართული ოცნების“ არალეგიტიმურ, პროირანულ და პროჩინურ რეჟიმზე, რათა დაიცვას თავისი სასიცოცხლო ეკონომიკური და გეოპოლიტიკური ინტერესები შავი ზღვის რეგიონშიც“, - წერს ხაზარაძე „ფეისბუქზე“.
