კოალიცია “ცვლილებისთვის” წევრის, გიორგი ბუტიკაშვილის განცხადებით, დიპლომატიური კორპუსის და საერთაშორისო ორგანიზაციების წარმომადგენლებთან შეხვედრისას განიხილეს, ის „დრაკონული კანონები, რომელიც „ქართული ოცნების“ წევრებმა მიიღეს“.

მისივე თქმით, დღევანდელ შეხვედრაზე ისაუბრეს „ბათუმელებისა” და „ნეტგაზეთის“ დირექტორის, მზია ამაღლობელის საკითხთან დაკავშირებითაც.

„ჩვენ დღეს შევხვდით დიპლომატიური კორპუსის და საერთაშორისო ორგანიზაციების წარმომადგენლებს. ჩვენ მათ გავაცანით ის დრაკონული კანონები, რომელიც „ქართული ოცნების“ წევრებმა მიიღეს. ჩვენ ასევე ვისაუბრეთ მზია ამაღლობელის საკითხთან დაკავშირებითაც. ასევე, [ვისაუბრეთ] გზაზე, თუ როგორ უნდა მივიდეთ ახალ არჩევნებამდე, რომელზეც ჩვენ ამდენი ხანი ვმუშაობდით. ეს დოკუმენტი უკვე არსებობს.

ცხადია, ჩვენ, ოთხმა კოალიციამ ერთად მოვიწიეთ დიპლომატიური კორპუსის წარმომადგენლები, უბრალოდ, პარტია „საქართველოს“ წევრებმა დღეს მოსვლა ვერ შეძლეს“, - განაცხადა ბუტიკაშვილმა.

ცნობისთვის, კოალიცია „ძლიერი საქართველოს“ ოფისში, სამი ოპოზიციური კოალიციის ლიდერები საქართველოში აკრედიტებული დიპლომატიური კორპუსის წარმომადგენლებს შეხვდნენ.