მოქალაქე გიორგი ოკრიბელაშვილი სასამართლომ ადმინისტრაციული სამართალდარღვევისთვის 3 500 ლარის ოდენობით დააჯარიმა.

როგორც გიორგი ოკრიბელაშვილმა ჟურნალისტებს განუცხადა, მას პოლიციისთვის სიტყვიერ შეურაცხყოფას ედავებოდნენ.

გიორგი ოკრიბელაშვილის თქმით, რამდენიმე დღის წინ მეუღლესთან ერთად იმყოფებოდა აქციებზე დაპატიმრებულთა მშობლების შეკრებაზე.

მისი თქმით, მეუღლესთან პირადი, ემოციური საუბარი ჰქონდა, რა დროსაც პოლიციამ დააკავა.

„მე და ჩემი მეუღლე ვიყავით აქციებზე დაპატიმრებულთა მშობლების შეკრებაზე. აღელვებული ვიყავი. იქიდან რომ მივდიოდით მე, ჩემი მეუღლე და კიდევ ერთი მშობელი ხელებს ვიქნევდი. სწორედ ამ დროს, ხელების ქნევაზე, მე თვითონაც ვერ გავიგე რა ხდებოდა, უცებ დამესხნენ და თავი ამოვყავი მანქანაში. მითხრეს, შეურაცხყოფას გვაყენებდიო და ამ დროს, მეუღლე ველაპარაკებოდი ხელებით. ანუ პირადი საუბარი მქონდა ოჯახის წევრთან.

სიმართლე გითხრათ, სასამართლოსგან ველოდებოდი მაქსიმალურ ჯარიმას 3500-ლარიდან 6000 ლარამდე, ან 2 თვიან პატიმრობას, მაგრამ გაითვალისწინა ჩემი შვილის, ოჯახის მდგომარეობა და მხოლოდ 3500 ლარით დამაჯარიმა”, - განაცხადა გიორგი ოკრიბელაშვილმა.

შეგახსენებთ, ასევე პატიმრობაში იმყოფება მისი შვილი ომარ ოკრიბელაშვილი. მას 2024 წლის 14 მაისს გამართულ აქციაზე პარლამენტის შესასვლელთან რკინის დამცავი ჯებირის დაზიანებას ედავებიან.