ერგნეთში ინციდენტების პრევენციისა და მათზე რეაგირების მექანიზმის ფარგლებში მორიგი შეხვედრა მიმდინარეობს.

როგორც ჟურნალისტებს სახელმწიფო უსაფრთხოების სამსახურის ანალიტიკური დეპარტამენტის უფროსის მოადგილემ, ირაკლი ანთაძემ განუცხადა, დღეის მდგომარეობით, უკანონო პატიმრობაში საქართველოს 6 მოქალაქე რჩება.

„დღევანდელ შეხვედრაზე მთავარი აქცენტი გაკეთდება უკანონო პატიმრობაში მყოფი საქართველოს მოქალაქეების გათავისუფლების საკითხზე. დღეის მდგომარეობით, უკანონო პატიმრობაში იმყოფება ჩვენი 6 თანამოქალაქე. ასევე, საუბარი შეეხება საანგარიშო პერიოდში უკანონო ე.წ. ბორდერიზაციის შემთხვევებს, რომლებიც 19 ნოემბრიდან დღემდე დაფიქსირდა. საანგარიშო პერიოდში, ჯამში, ე.წ. ბორდერიზაციის 11 შემთხვევაა დაფიქსირებული. მათ შორის: ნოემბერში 1, დეკემბერში 3, იანვრის თვეში 2 და თებერვალში 5“, - განაცხადა ირაკლი ანთიძემ.