რუსეთის დუმის სპიკერი - ევროკავშირსა და მის საერთაშორისო ინსტიტუტებს სერიოზული ცვლილებები ელის, ეს ადვილად არ მოხდება და მტკივნეული იქნება
ევროკავშირსა და მის საერთაშორისო ინსტიტუტებს, მათ შორის საპარლამენტოს, სერიოზული ცვლილებები ელოდება, რაც მიუნხენის უსაფრთხოების კონფერენციამ აჩვენა, - ამის შესახებ რუსეთის სახელმწიფო დუმის სპიკერი, ვიაჩესლავ ვოლოდინი „ტელეგრამ“ არხზე წერს.
„მიუნხენში მიმდინარე მოვლენების გაანალიზებისას, შეგვიძლია დარწმუნებით ვთქვათ: ევროკავშირს, მის საერთაშორისო ინსტიტუტებს, მათ შორის საპარლამენტოს, სერიოზული ცვლილებები ელის“, - წერს ვოლოდინი და დასძენს, რომ ეს ცვლილებები ადვილად არ მოხდება და მტკივნეული იქნება.
მისი მტკიცებით, კონფერენციაზე აშშ-ის ვიცე-პრეზიდენტმა, ჯეი დი ვენსმა ობიექტურად შეაფასა ის, რაც ევროპის ქვეყნებში ხდება.
"მაგრამ მას მხარი არ დაუჭირეს. კონფერენციის მონაწილეები არ იყვნენ მზად საკუთარ თავზე სიმართლის მოსმენისთვის", - წერს რუსეთის სახელმწიფო დუმის სპიკერი.
„ევროკავშირის ბევრ ქვეყანაში დემოკრატიული პროცედურები დეკორატიულ ხასიათს იძენს. პანევროპულ სტრუქტურებში ის დიდი ხანია დავიწყებული და იგნორირებულია“, - წერს ვოლოდინი.
