ინდოეთში რკინიგზის სადგურზე მომხდარი ჭყლეტის შედეგად 18 ადამიანი დაიღუპა
ინდოეთის დედაქალაქ ნიუ-დელიში, რკინიგზის სადგურზე მომხდარი ჭყლეტის შედეგად, სულ მცირე, 18 ადამიანი დაიღუპა და 10 დაშავდა, - ინფორმაციას BBC-ი ავრცელებს.
გამოცემის ცნობით, შემთხვევა მაშინ მოხდა, როდესაც ასობით ადამიანი კუმბა-მელას რელიგიურ დღესასწაულზე დასასწრებად, რომელიც ქალაქ პრაიაგრაჯში მეზობელ უტარ-პრადეშის შტატში იმართება, დაგვიანებულ მატარებელზე ასვლას ცდილობდა, ნაწილი კი აღნიშნული დღესასწაულიდან უკან ბრუნდებოდა.
დაღუპილთა შორის 4 ბავშვი და 10 ქალია.
ოპოზიციის ლიდერები მომხდარში ხელისუფლებას ადანაშაულებენ.
„პრაიაგრაჯში მიმავალი მორწმუნეების დიდი რაოდენობის გათვალისწინებით, სადგურზე უკეთესი ორგანიზება უნდა განხორციელებულიყო“, - განაცხადა ინდოეთის საპარლამენტო ოპოზიციის ლიდერმა, რაჰულ განდიმ.
ადგილობრივ პოლიციაში აცხადებენ, რომ მიმდინარეობს გამოძიება იმასთან დაკავშირებით, თუ რამ გამოიწვია ჭყლეტა.
v-if="article.gallery" v-html="article.gallery"
