ვოლოდიმირ ზელენსკი - რუსეთთან ომში 46 ათასზე მეტი უკრაინელი ჯარისკაცი დაიღუპა - ათიათასობით ჯარისკაცი უგზო-უკვლოდ დაკარგულია

რუსეთის ფედერაციასთან ომში უკრაინამ 46 ათასზე მეტი სამხედრო მოსამსახურე დაკარგა, კიდევ 380 ათასი ჯარისკაცი დაიჭრა, - ამის შესახებ უკრაინის პრეზიდენტმა, ვოლოდიმირ ზელენსკიმ NBC News-თან ინტერვიუში განაცხადა.

მისივე განცხადებით, ამ დროისთვის, ათიათასობით ჯარისკაცი დაკარგულად ითვლება.

„გვაქვს ფიქსირებული მსხვერპლი - 46 ათასზე მეტი დაღუპული ჯარისკაცი. ჯერ კიდევ ათიათასობით უგზო-უკვლოდ დაკარგულია. უგზო-უკვლოდ დაკარგულები შეიძლება გარდაცვლილები იყვნენ, ან ტყვეობაში იმყოფებოდნენ, - აღნიშნა ზელენსკიმ.

ამასთან, მისი თქმით, შეუძლებელია დაღუპული მშვიდობიანი მოსახლეობის ზუსტი რაოდენობის დადგენა, რადგან ქვეყნის ტერიტორიების ნაწილი ოკუპაციის ქვეშ რჩება.

პრეზიდენტ ზელენსკის ინფორმაციით, რუსეთში დეპორტირებულია, დაახლოებით, 19,5 ათასი უკრაინელი ბავშვი.