2008 წლის ომის დაწყებამდე, „ნაციონალური მოძრაობის“ რეჟიმმა, სისხლის სამართლის კოდექსიდან გააქრო სამშობლოს ღალატის მუხლი - ეს დღევანდელი გადასახედიდან აბსოლუტურად გასაგებია, რადგანაც ეს რეჟიმი, პირდაპირი მნიშვნელობით, აპირებდა საკუთარი ქვეყნის ღალატს, - ამის შესახებ პარლამენტის საპროცედურო საკითხთა და წესების კომიტეტის თავმჯდომარემ, დავით მათიკაშვილმა ჟურნალისტებთან განაცხადა.

მისი თქმით, სისხლის სამართლის კოდექსში აღდგება სამშობლოს ღალატის მუხლი, სადაც განისაზღვრება თუ რა იქნება ის ქმედება, რომელიც ჩაითვლება სამშობლოს ღალატად.

„საზოგადოებას ახსოვს, რომ 2008 წლის ომის დაწყებამდე, „ნაციონალური მოძრაობის“ რეჟიმმა, სისხლის სამართლის კოდექსიდან გააქრო სახელმწიფოს ღალატის, იგივე სამშობლოს ღალატის მუხლი. ეს დღევანდელი გადასახედიდან არის აბსოლუტურად გასაგები, რადგანაც ეს რეჟიმი, პირდაპირი მნიშვნელობით, აპირებდა საკუთარი ქვეყნის ღალატს, რაც, პრინციპში, მანამდეც ჩაუდენია, თუმცა 2008 წლის მოვლენები ამ მოცემულობის მკაფიო ხაზგასმაა. იყო ღალატის მთელი კასკადი, რომელმაც ჩვენი ქვეყანა უმძიმეს მდგომარეობაში ჩააგო. ოკუპანტს საშუალება მისცა ქვეყნის ტერიტორიის 20% მიესაკუთრებინა და ტერიტორიული მთლიანობის აღდგენის საკითხი, რა თქმა უნდა, ძალიან გაართულა. ამ ყველაფერს, ცხადია, მოჰყვა ადამიანთა სიცოცხლის მოსპობა, უმძიმესი შედეგები ქვეყნის ეკონომიკური განვითარების მხრივ. თუმცა არა მხოლოდ 2008 წელი, შეგვიძლია ავიღოთ „ნაციონალური მოძრაობის" მხრიდან ღალატის მკაფიო დადასტურებად არა ერთი ფაქტი, თუნდაც ომის შემდეგ მნიშვნელოვანი ენერგეტიკული ობიექტების მიყიდვა რუსეთისთვის და არაერთი რამ, რაზეც პრინციპში, დღეს საგამოძიებო კომისია პარლამენტში მუშაობს და ის კიდევ უფრო მკაფიოს გახდის „ნაციონალური მოძრაობის" მიერ ჩადენილო ღალატის ფაქტებს. სისხლის სამართლის კოდექსში აღდგება სამშობლოს ღალატის მუხლი. ის განსაზღვრავს, თუ რა იქნება ის ქმედება, რომელიც ჩაითვლება ქვეყნის, სამშობლოს ღალატად," - განაცხადა მათიკაშვილმა.