ლანჩხუთის მუნიციპალიტეტის სოფელ ჩოჩხათში მითაიშვილების საცხოვრებელი სახლი ჩამოინგრა. როგორც ოჯახის წევრები „ინტერპრესნიუსთან“ საუბრისას აცხადებენ, თავს მიკროავტობუსს აფარებენ.

„სახლი ჩამოგვენგრა. მიკროავტობუსში ვაფარებთ თავს. ბავშვები სახლში არ გვყავს, მე და ჩემი მეუღლე ვართ. ხმა გავიგეთ და გამოვასწარით წამიერად, პირდაპირ საწოლზე დაეცა ნანგრევები. მივმართეთ სამაშველოს მაგრამ არაა გზები, საერთოდ გზა არაა, რომ ვინმე მოვიდეს. გაიწმინდება და მოვალთო, მერე არ გვჭირდება. ტელეფონსაც ვერ ვტენით. მეზობლების სახლებიც საფრთხის ქვეშაა. მეწყერსაშიში ზონაა. ჩვენ ეკომიგრანტის სტატუსი გვაქვს, გასახლება მაქვს, ველოდები თანხის ჩარიცხვას. ვერ წავედით, მთელი პროცედურები სჭირდება“, - აცხადებს ინგა მითაიშვილი.

როგორც ლანჩხუთის მერმა ალექსანდრე სარიშვილმა “ინტერპრესნიუსთან" საუბრისას განაცხადა, მაქსიმალურს აკეთებენ, რომ მათ დროული დახმარება აღმოუჩინონ.

"მაქვს ინფორმაცია აღნიშნულ ოჯახთან დაკავშირებით. მაქსიმალურს ვაკეთებთ, რომ დროული დახმარება აღმოვუჩინოთ. სოფლის ცენტრამდე გზა თითქმის გაიწმინდა. რთული მდგომარეობაა მუნიციპალიტეტში, ოჯახები ჩარჩენილი არიან თოვლში. მათ დასახმარებლად ყველაფერს ვაკეთებთ”,- განაცხადა ლანჩხუთის მერმა.