დიდი ბრიტანეთი თავდაცვის ხარჯებს მშპ-ის 2.5%-მდე გაზრდის. ამის შესახებ დიდი ბრიტანეთის პრემიერ-მინისტრმა, კირ სტარმერმა განაცხადა.

“ჩემი, როგორც პრემიერ-მინისტრის, უპირველესი ვალდებულებაა, ამ ქვეყნის უსაფრთხოების უზრუნველყოფა.

სწორედ ამიტომ თავდაცვის ხარჯებს მშპ-ის 2.5%-მდე ვზრდით 2027 წლის აპრილიდან.

ეს კიდევ უფრო საშიში სამყაროა, სასიცოცხლოდ მნიშვნელოვანია, რომ ბრიტანელი ხალხი სახლში დავიცვათ”, - წერს სტარმერი X-ის საკუთარ გვერდზე.

მოგვიანებით გამართულ პრესკონფერენციაზე სტარმერმა განაცხადა, რომ ეს “მნიშვნელოვანი მომენტია” და ამ თაობამ უნდა “იბრძოლოს მშვიდობისთვის”.

მან აღნიშნა, რომ ბოლო სამი წლის განმავლობაში - უკრაინაში რუსეთის ფართომასშტაბიანი შეჭრის დაწყებიდან - ყველამ იცოდა “გულის სიღრმეში”, რომ ეს გადაწყვეტილება მოსალოდნელი იყო.

სტარმერმა აღნიშნა, რომ მისი პრემიერ-მინისტრობის პერიოდში ის მუდმივად ამტკიცებს, რომ ევროპულმა ქვეყნებმა, მათ შორის დიდმა ბრიტანეთმა, მეტი უნდა გააკეთონ კოლექტიური თავდაცვისთვის.

“სიმართლეა, რომ ტრამპი ამბობს, რომ მეტი უნდა გავაკეთოთ. და მას ვეთანხმები”, - განაცხადა სტარმერმა.

ცნობისთვის, 27 თებერვალს სტარმერის ვაშინგტონში ვიზიტი და აშშ-ის პრეზიდენტ დონალდ ტრამპთან შეხვედრაა დაგეგმილი. დიდი ბრიტანეთის პრემიერ-მინისტრმა აღნიშნა, რომ ის დღეს, 25 თებერვალს, ტელეფონით ესაუბრა საფრანგეთის პრეზიდენტ ემანუელ მაკრონს, რომელიც ვაშინგტონიდან დაბრუნდა.