ვოლოდიმირ ზელენსკიმ თეთრ სახლში შეხვედრის ფიასკოდ გადაქცევისთვის ბოდიში უნდა მოიხადოს,- ამის შესახებ აშშ-ის სახელმწიფო მდივანმა, მარკო რუბიომ აშშ-ისა და უკრაინის პრეზიდენტების, დონალდ ტრამპისა და ვოლოდიმირ ზელენსკის შეხვედრის შემდეგ, CNN-თან ინტერვიუში განაცხადა.

„ვოლოდიმირ ზელენსკიმ ბოდიში უნდა მოიხადოს ამის ფიასკოდ გადაქცევისთვის. არ იყო იმის საჭიროება, რომ ასეთი ანტაგონისტური ყოფილიყო“, - განაცხადა მარკო რუბიომ.

მისი თქმით, არ არის დარწმუნებული, რომ უკრაინის პრეზიდენტს, ვოლოდიმირ ზელენსკის მშვიდობის მიღწევა სურს.

„როდესაც ასე აგრესიულად იწყებთ საუბარს და პრეზიდენტი მთელი ცხოვრებაა გარიგებებს დებს, თქვენ ხალხის მოლაპარაკებების მაგიდასთან მიყვანა არ გსურთ. ამიტომ, შემდეგ ვფიქრობ, რომ შესაძლოა ზელენსკის სამშვიდობო შეთანხმება არ სურს. ის ამბობს, რომ სურს, მაგრამ შეიძლება ეს ასე არ არის“, - აღნიშნა აშშ-ის სახელმწიფო მდივანმა.

შეგახსენებთ, 28 თებერვალს, უკრაინის პრეზიდენტმა, ვოლოდიმირ ზელენსკიმ აშშ-ის პრეზიდენტთან, დონალდ ტრამპთან და ვიცე-პრეზიდენტთან, ჯეი დი ვენსთან ხმამაღალი კამათის შემდეგ თეთრი სახლი დროზე ადრე დატოვა. მომხდარის შემდეგ დონალდ ტრამპმა განაცხადა, რომ ვოლოდიმირ ზელენსკი „მშვიდობისთვის მზად არ არის“.