პეტრ ფიალა - დონალდ ტრამპის გადაწყვეტილება ევროპის ამჟამინდელ პოლიტიკაში ფუნდამენტური ცვლილების გადაუდებელ აუცილებლობას ხაზს უსვამს - დროა, ევროპა სიტყვებიდან მოქმედებაზე მტკიცედ გადავიდეს
ჩეხეთის პრემიერ-მინისტრი, პეტრ ფიალა უკრაინის დახმარების დაპაუზებასთან დაკავშირებით დონალდ ტრამპის გადაწყვეტილებას ეხმაურება და აცხადებს, რომ ეს ხაზს უსვამს ევროპის ამჟამინდელ პოლიტიკაში ფუნდამენტური ცვლილების გადაუდებელ აუცილებლობას.
„პრეზიდენტი ტრამპის გადაწყვეტილება ხაზს უსვამს ევროპის ამჟამინდელ პოლიტიკაში ფუნდამენტური ცვლილების გადაუდებელ აუცილებლობას. ჩვენ უნდა გავაძლიეროთ ჩვენი ეკონომიკური და სამხედრო შესაძლებლობები და ავიღოთ სრული პასუხისმგებლობა საკუთარ უსაფრთხოებაზე. ეს მოითხოვს გაზრდილ ინვესტიციებს თავდაცვაში. ჩვენი უსაფრთხოების უზრუნველყოფა ასევე ნიშნავს უკრაინისადმი ჩვენი მხარდაჭერის გაძლიერებას. რუსეთის აგრესიულ პოლიტიკას, რომელიც ყველას გვემუქრება, წარმატების უფლებას ვერ მივცემთ“, - აღნიშნა ჩეხეთის პრემიერმა.
მისი თქმით, ფუნდამენტური საერთაშორისო გამოწვევების გადასაჭრელად სხვებზე დაყრდნობის ეპოქა დასრულდა.
„დროა, ევროპა მტკიცედ გადავიდეს სიტყვებიდან მოქმედებაზე“, - დასძინა პეტრ ფიალამ.
