დონალდ ტრამპმა თქვა, რომ გრენლანდიის თვითგამორკვევის უფლებას პატივს სცემს, ეს მნიშვნელოვანია, - ამის შესახებ დანიის საგარეო საქმეთა მინისტრმა, ლარს ლოკე რასმუსენმა განაცხადა.

„ტრამპმა თქვა, რომ გრენლანდიის თვითგამორკვევის უფლებას პატივს სცემს და ეს, ჩემი აზრით, მისი გამოსვლის ყველაზე მნიშვნელოვანი ნაწილია“, - განაცხადა დანიის საგარეო საქმეთა მინისტრმა.

რასმუსენმა აღნიშნა, რომ არქტიკაში უსაფრთხოებასთან დაკავშირებით დანიასა და გრენლანდიას აშშ-თან საერთო ინტერესები აქვთ.

„ჩვენ მზად ვართ ვიმუშაოთ ჩვენს ამერიკელ მეგობრებთან ამ მიზნის მისაღწევად, მაგრამ, რა თქმა უნდა, ეს დაფუძნებული იქნება იმ ფაქტზე, რომ ჩვენ დანიის სამეფოს წარმოვადგენთ“, - აღნიშნა ლარს ლოკე რასმუსენმა.

ცნობისთვის, აშშ-ის პრეზიდენტმა, დონალდ ტრამპმა კონგრესში სიტყვით გამოსვლისას აღნიშნა, რომ აშშ გრენლანდიელი ხალხის უფლებას, თავიანთი მომავალი განსაზღვრონ, მხარს უჭერს.

„მაქვს მესიჯი არაჩვეულებრივი გრენლანდიელი ხალხისთვის. ჩვენ მტკიცედ ვუჭერთ მხარს თქვენს უფლებას, განსაზღვროთ საკუთარი მომავალი და თუ აირჩევთ, მოგესალმებით ამერიკის შეერთებულ შტატებში. ჩვენ გვჭირდება გრენლანდია ეროვნული უსაფრთხოებისთვის და საერთაშორისო უსაფრთხოებისთვისაც კი. ჩვენ ვმუშაობთ ყველა ჩართულ მხარესთან, რათა ვცადოთ მისი მიღება. მაგრამ ის ნამდვილად გვჭირდება საერთაშორისო მსოფლიო უსაფრთხოებისთვის და ვფიქრობ, რომ ჩვენ მას მივიღებთ - ასე თუ ისე, ჩვენ მას მივიღებთ“, - აღნიშნა ტრამპმა.