კანადა დაგეგმილი საპასუხო ტარიფების მეორე რაუნდს 4 000-ზე მეტი სახეობის ამერიკულ საქონელზე 2 აპრილამდე დააპაუზებს, - CNN-ის ცნობით, ამის შესახებ კანადის ფინანსთა მინისტრმა დომინიკ ლებლანმა X-ზე გამოქვეყნებულ პოსტში განაცხადა.

”შეერთებული შტატები დათანხმდა, რომ 2 აპრილამდე შეაჩეროს ტარიფები კანადიდან CUSMA-ით გათვალისწინებული საქონლის ექსპორტზე. შედეგად, კანადა 2 აპრილამდე არ განახორციელებს ტარიფების მეორე ტალღას 125 მილიარდი დოლარის ღირებულების ამერიკულ პროდუქტებზე, ამავდროულად ვაგრძელებთ მუშაობას ყველა ტარიფის მოხსნაზე“, - წერს ლებლანი.

კანადურმა მხარემ ეს განცხადება მას შემდეგ გააკეთა, რაც აშშ-ის პრეზიდენტმა, დონალდ ტრამპმა გამოაცხადა, რომ მექსიკა და კანადა 2 აპრილამდე გათავისუფლდებიან ტარიფებისგან საქონელზე, რომელზედაც კანადა-შეერთებული შტატები-მექსიკის შეთანხმება (CUSMA) ვრცელდება.