თეთრ სახლს ჯერ არ მიუღია გადაწყვეტილება 240 000 უკრაინელი ლტოლვილის სამართლებრივ სტატუსთან დაკავშირებით, რომლებიც ამჟამად შეერთებულ შტატებში ცხოვრობენ. შესაბამისი განცხადება დონალდ ტრამპმა ოვალურ კაბინეტში ჟურნალისტებთან შეხვედრაზე გააკეთა.

შეკითხვაზე, განიხილავს თუ არა უკრაინელებისთვის დროებითი დაცვის ქვეშ მყოფის სტატუსის გაუქმებას, დონალდ ტრამპმა უპასუხა:

„არ გვსურს ვინმეს ზიანი მივაყენოთ და, რა თქმა უნდა, არ ვცდილობთ მათთვის ზიანის მიყენებას. მე ამას განვიხილავ. იყვნენ ადამიანები, რომლებიც ფიქრობენ, რომ ეს მიზანშეწონილია, ზოგი კი ასე არ ფიქრობდა. გადაწყვეტილებას მალე მივიღებ, მაგრამ არ გვსურს, მათ ვავნოთ, განსაკუთრებით უკრაინელებს, მათ ბევრი რამ გამოიარეს“, - აღნიშნა ტრამპმა.

ცნობისთვის, Reuters-მა, ინფორმირებულ სამ წყაროზე დაყრდნობით, გუშინ გაავრცელა ინფორმაცია, რომ აშშ-ის პრეზიდენტ დონალდ ტრამპის ადმინისტრაცია გეგმავს, 240 000 უკრაინელს, რომლებმაც ქვეყანა რუსეთთან კონფლიქტის გამო დატოვეს, დროებითი ლეგალური სტატუსი გაუუქმოს. როგორც გამოცემა წერს, "ეს ნაბიჯი პოტენციურად დააჩქარებს უკრაინელების აშშ-დან დეპორტაციას".