ბოსნია და ჰერცოგოვინას საკონსტიტუციო სასამართლომ სერბთა რესპუბლიკის პარლამენტის მიერ მიღებული სეპარატისტული კანონების მოქმედება დროებით შეაჩერა, - ამის შესახებ ინფორმაციას სააგენტო Reuters-ი ავრცელებს.
ბოსნია და ჰერცოგოვინას საკონსტიტუციო სასამართლომ განაცხადა, რომ სერბთა რესპუბლიკის ლიდერის, მილორად დოდიკის მიერ ხელმოწერილ სეპარატისტულ კანონებს სერიოზული შედეგები მოჰყვება და იგი საფრთხეს უქმნის ბოსნია და ჰერცოგოვინას სუვერენიტეტსა და კონსტიტუციურ წესრიგს.
საკონსტიტუციო სასამართლომ გადაწყვეტილება ხელისუფლების მაღალჩინოსნების საჩივრის საფუძველზე მიიღო, რომლებიც აცხადებენ, რომ სერბთა რესპუბლიკის პარლამენტის მიერ მიღებული კანონები კონსტიტუციურ წესრიგზე თავდასხმას წარმოადგენს.
„ყველა, ვინც ბოსნია და ჰერცოგოვინას სახელმწიფოს ებრძვის, უნდა იცოდეს, რომ ამას შედეგები მოჰყვება“, - განაცხადა ბოსნია და ჰერცოგოვინას სამმხრივი პრეზიდიუმის ბოსნიელმა წევრმა, დენის ბეჩიროვიჩმა.
ამასთან, ბეჩიროვიჩმა EUFOR-ს, ევროკავშირის სამშვიდობო ძალებს, ბოსნია და ჰერცოგოვინას სტრატეგიულ პუნქტებში სარეზერვო ძალების განთავსებისკენ მოუწოდა.
ცნობისთვის, ბოსნია და ჰერცოგოვინაში ვითარება გასულ კვირას დაიძაბა, როდესაც სახელმწიფო სასამართლომ სერბთა რესპუბლიკის ლიდერს, მილორად დოდიკს საერთაშორისო სამშვიდობო წარმომადგენლის ბრძანებების დაუმორჩილებლობის გამო ერთი წლით თავისუფლების აღკვეთა მიუსაჯა და ექვსი წლით პოლიტიკური თანამდებობის დაკავება აუკრძალა.
