უკრაინის პრეზიდენტი, ვოლოდიმირ ზელენსკი იმედოვნებს, რომ საუდის არაბეთში უკრაინისა და აშშ-ის წარმომადგენლებს შორის შეხვედრა შედეგიანი იქნება როგორც მშვიდობასთან დაახლოების, ასევე უკრაინის მიმართ შეერთებული შტატების მხარდაჭერის კუთხით.

„გავაგრძელებთ მუშაობას მშვიდობასთან დაახლოების მიზნით - ვეწვევი საუდის არაბეთს. კიდევ უფრო მომზადებული გახდა ჩვენი გუნდების შეხვედრა საუდის არაბეთში. შედეგების იმედი გვაქვს და ეს ეხება როგორც მშვიდობასთან დაახლოებას, ასევე მხარდაჭერის გაგრძელებას“, - აღნიშნა ზელენსკიმ.

პრეზიდენტმა ვოლოდიმირ ზელენსკიმ ადრე განაცხადა, რომ 10 მარტს საუდის არაბეთში გაემგზავრება, სადაც პრინც მუჰამედ ბინ სალმანს შეხვდება და რომ მისი გუნდი ქვეყანაში დარჩება და ამერიკულ მხარესთან მოლაპარაკებებს გამართავს.

8 მარტს ზელენსკიმ გამოაცხადა, რომ 11 მარტს დაგეგმილ მოლაპარაკებებზე უკრაინას წარმოადგენენ : პრეზიდენტის ოფისის ხელმძღვანელი ანდრეი ერმაკი, საგარეო საქმეთა მინისტრი ანდრეი სიბიგა, თავდაცვის მინისტრი რუსტემ უმეროვი და პრეზიდენტის ოფისის უფროსის ხელმძღვანელის მოადგილე პაველ პალისა. გუშინ აშშ-ის სახელმწიფო დეპარტამენტმა დაადასტურა, რომ სახელმწიფო მდივანი, მარკო რუბიო უკრაინელ კოლეგებთან მოლაპარაკებებისთვის 10-12 მარტს საუდის არაბეთს ეწვევა.