რუმინელ ულტრამემარჯვენე კალინ ჯორჯესკუს ქვეყნის ცენტრალურმა საარჩევნო ბიურომ (BEC) მაისში დაგეგმილ საპრეზიდენტო არჩევნებში მონაწილეობა აუკრძალა, რამაც მის მხარდამჭერებსა და პოლიციას შორის შეტაკებები გამოიწვია, - ინფორმაციას BBC-ი ავრცელებს.

დედაქალაქ ბუქარესტში, ცენტრალურ საარჩევნო ბიუროსთან შეკრებილი ათასობით მომიტინგის წინააღმდეგ პოლიციამ ცრემლსადენი გაზი გამოიყენა. BBC-ი წერს, რომ სულ მცირე ოთხი ადამიანი დააკავეს.

შეგახსენებთ, გასულ წელს რუმინეთის საკონსტიტუციო სასამართლომ ნოემბერში ჩატარებული არჩევნების პირველი ტურის შედეგები გააუქმა, რომელშიც კალინ ჯორჯესკუ ლიდერობდა. სასამართლომ ეს გადაწყვეტილება მას შემდეგ მიიღო, რაც ქვეყნის დაზვერვამ გამოავლინა, რომ ჯორჯესკუს მხარდამჭერი TikTok-ის 800 ანგარიშის უკან რუსეთი იდგა.

კალინ ჯორჯესკუსთან დაკავშირებით სისხლის სამართლის გამოძიება ექვსი მუხლით მიმდინარეობს, მათ შორისაა ფაშისტური ორგანიზაციის წევრობა და საარჩევნო კამპანიის დაფინანსების შესახებ ცრუ ინფორმაციის მიწოდება.