დიდი ოდენობით საბიუჯეტო თანხების ჯგუფურად გაფლანგვაში ბრალდებულების, ყოფილი პრეზიდენტის, მიხეილ სააკაშვილისა და სახელმწიფო დაცვის სპეციალური სამსახურის ყოფილი უფროსის, თეიმურაზ ჯანაშიას ბრალდების სისხლის სამართლის საქმეზე თბილისის საქალაქო სასამართლოში დასკვნითი სხდომა მიმდინარეობს.

დღევანდელ სასამართლო სხდომაზე ბრალდებულები მოსამართლე ბადრი კოჭლამაზაშვილს დასკვნითი სიტყვით მომართავენ.

ასევე მოსამართლემ სხდომის დაწყებამდე განაცხადა, რომ ის საბოლოო განაჩენის გამოტანად რამდენიმე დღით ისარგებლებს.

პროცესს კლინიკა „ვივამედიდან" მიხეილ სააკაშვილი დისტანციურად ესწრება.

ცნობისთვის, აღნიშნულ საქმეს, რომელსაც საზოგადოება ე.წ. პიჯაკების საქმედ იცნობს, მიხეილ სააკაშვილთან ერთად ბრალდებულია სახელმწიფო დაცვის სპეციალური სამსახურის ყოფილი უფროსი თეიმურაზ ჯანაშიაც. პროკურატურა ბრალდებულებს საბიუჯეტო თანხის დიდი ოდენობით - 9 მილიონი ლარის ჯგუფურად გაფლანგვას ედავება.