უკრაინისა და აშშ-ის დელეგაციების შეხვედრის წინ დიდი ბრიტანეთის პრემიერ-მინისტრი, კირ სტარმერი აშშ-ის პრეზიდენტს, დონალდ ტრამპს ესაუბრა. ამის შესახებ ინფორმაციას სააგენტო Reuters-ი დიდი ბრიტანეთის პრემიერ-მინისტრის პრესსპიკერზე დაყრდნობით ავრცელებს.

„პრემიერმა იმედი გამოთქვა, რომ მოლაპარაკებებს პოზიტიური შედეგი ექნება, რაც აშშ-ს დახმარებისა და დაზვერვის გაზიარების განახლების საშუალებას მისცემს“, - განაცხადა კირ სტარმერის პრესსპიკერმა.

ამასთან, მისი თქმით, დიდი ბრიტანეთის პრემიერ-მინისტრმა, კირ სტარმერმა აშშ-ის პრეზიდენტს, დონალდ ტრამპმს განუცხადა, რომ „გასულ შაბათ-კვირას ბრიტანელი ოფიციალური პირები უკრაინელ ოფიციალურ პირებს ესაუბრნენ და ისინი ხანგრძლივი მშვიდობის ერთგულები რჩებიან“.

შეგახსენებთ, ხვალ საუდის არაბეთის ქალაქ ჯიდაში აშშ-სა და უკრაინის ოფიციალურ პირებს შორის შეხვედრა გაიმართება. უკრაინის პრეზიდენტის, ვოლოდიმირ ზელენსკის ცნობით, უკრაინის დელეგაციას პრეზიდენტის ოფისის ხელმძღვანელი ანდრეი ერმაკი, საგარეო საქმეთა მინისტრი ანდრეი სიბიგა, თავდაცვის მინისტრი რუსტემ უმეროვი და პრეზიდენტის ოფისის ხელმძღვანელის მოადგილე პაველ პალისა წარმოადგენენ. აშშ-ის დელეგაციას სახელმწიფო მდივანი მარკო რუბიო უხელმძღვანელებს. ასევე, მოსალოდნელია, რომ მას უსაფრთხოების საკითხებში აშშ-ის პრეზიდენტის მრჩეველი, მაიკ უოლცი და ახლო აღმოსავლეთში დონალდ ტრამპის სპეციალური წარმომადგენელი, სტივ ვიტკოფი შეუერთდებიან.