რუსეთის საგარეო საქმეთა მინისტრის, სერგეი ლავროვის განცხადებით, ევროპის უსაფრთხოებისა და თანამშრომლობის ორგანიზაციის (ეუთოს) გენერალურ მდივანთან, ფერიდუნ სინირლიოღლუსთან უკრაინის კონფლიქტის მოგვარების გზები განიხილა.

„ვისაუბრეთ იმაზე, თუ როგორ იქნება შესაძლებელი უკრაინაში კონფლიქტის მოგვარება“, - განაცხადა ლავროვმა ეუთო-ს გენერალურ მდივანთან შეხვედრის შემდეგ გამართულ პრესკონფერენციაზე.

მისი თქმით, ამ მხრივ, რუსეთის პოზიცია ნათელია.

„რუსეთის პრეზიდენტმა ვლადიმერ პუტინმა ხაზი გაუსვა მის მზადყოფნას მოლაპარაკებებისთვის და იმ პრინციპებისთვის, რომელთა უგულებელყოფა არ შეიძლება, თუ გვინდა საიმედოდ გადავწყვიტოთ ეს კონფლიქტი, აღმოვფხვრათ მისი ძირითადი მიზეზები“, - დასძინა რუსეთის საგარეო საქმეთა მინისტრმა.

მისი თქმით, რუსეთი მზად არის და გააგრძელებს უკრაინის საკითხი განხილვას შეერთებულ შტატებთან და ყველა იმ ქვეყანასთან, ვინც მზად არის ხელი შეუწყოს კონფლიქტის მოგვარებას.

„რა თქმა უნდა, ჩვენ განვიხილავთ და მზად ვართ ვიმსჯელოთ უკრაინის საკითხზე ყველასთან, ვინც გულწრფელად არის დაინტერესებული დახმარების გაწევით“, - განაცხადა ლავროვმა.