“ქართული ოცნების“ დეპუტატის, არჩილ გორდულაძის განცხადებით, თუ მედიაორგანიზაციებს “ჩადენილი დარღვევების შემთხვევაში“ ჯარიმები 2025 წლის 1-ელ ივნისამდე დაეკისრება, კომუნიკაციების კომისიის შესაბამისი გადაწყვეტილება აღსასრულებლად არ მიექცევა.

როგორც გორდულაძემ პარლამენტის დარგობრივი ეკონომიკისა და ეკონომიკური პოლიტიკის კომიტეტის სხდომაზე განმარტა, ეს მნიშვნელოვანია იმისთვის, რათა მმართველ გუნდს არ დასწამონ ცილი, რომ სურს, მაუწყებლების საქმიანობაში ჩარევა და მათ მიმართ ჯარიმების და გაფრთხილებების მექანიზმების მომენტალურად, ყოველგვარი დროის გარეშე ამოქმედება.

“ეს მნიშვნელოვანია იმისთვის, რომ მაუწყებლებს მიეცეთ შესაძლებლობა, პრაქტიკიდან და კომისიის მითითებებიდან გამომდინარე კანონი დაიცვან და ზუსტი და ჯეროვანი ინფორმაციის მიწოდება უზრუნველყონ“, - განაცხადა არჩილ გორდულაძემ.

“ქართული ოცნების“ გადაწყვეტილებით, სატელევიზიო და რადიო მაუწყებლებთან დაკავშირებით მთელი რიგი აკრძალვები და შეზღუდვები წესდება. ამ მიმართულებით პარლამენტში ორი - ერთმანეთისგან დამოუკიდებელი კანონის პროექტია ინიცირებული. ამასთან, როგორც დღეს გახდა ცნობილი, სატელევიზიო და რადიო მაუწყებლებთან დაკავშირებული რეგულაციები ინტერნეტმედიასა და სხვადასხვა სოციალურ პლატფორმაზე განთავსებულ ინფორმაციაზეც გავრცელდება.