გამოცემა „ბათუმელებისა“ და „ნეტგაზეთის“ დამფუძნებლის მზია ამაღლობელის ადვოკატებმა, ბათუმის საქალაქო სასამართლოში მზია ამაღლობელის სისხლის სამართლის საქმის განმხილველი მოსამართლის, ნინო სახელაშვილის აცილების შუამდგომლობა დააყენეს, რაც თავად მოსამართლემ არ გაიზიარა.

ადვოკატების განმარტებით, ნინო სახელაშვილს არ აქვს შესაბამისი იურიდიული განათლება, აკრძალული აქვს ევროკავშირის რამდენიმე ქვეყანაში შესვლა და „ჩართულია მზია ამაღლობელის უკანონო დევნაში“, რაც მისი აცილების საფუძველია.

„გიდასტურებთ, რომ სასამართლოს ამ შემადგენლობას სისხლის სამართლის სპეციალიზაციით არ აქვს ჩაბარებული გამოცდა, თუმცა მათ ვერ მიუთითეს ვერცერთ კანონის ნორმაზე, სადაც მსგავსი ჩანაწერი ან მოთხოვნა არსებობს მოქმედი კანონმდებლობიდან გამომდინარე. შესაბამისად, სასამართლოს ამ შემადგენლობას, მოქმედი კანონმდებლობიდან გამომდინარე, ჩაბარებული აქვს კერძო სამართლისა და ადმინისტრაციული სამართლის, საჯარო სამართლის სპეციალიზაციით მოსამართლის საკვალიფიკაციო გამოცდები. ამის შემდეგ, მოქმედი კანონის შესაბამისად, ჩარიცხული ვარ იუსტიციის უმაღლეს სკოლაში, სადაც დეტალურად გავიარე ყველა ის სავალდებულო მოთხოვნები, რომელიც მოქმედი კანონმდებლობიდან გამომდინარე არის საჭირო. მინდა საზოგადოებას და დაცვის მხარეს განვუმარტო, რომ მოქმედი კანონის შესაბამისად, არცერთი კანონის ნორმა არ ავალდებულებს, რომ აუცილებლად ჩაბარებული იყოს სისხლის სამართლის სპეციალიზაციის გამოცდა. ასევე, ეს დაბრკოლებას წარმოადგენდეს, რომ მას არ ჰქონდეს უფლებამოსილება, თუ მან ყველა ეტაპი გაიარა. იმ სავალდებულო მოთხოვნებიდან გამომდინარე, რაც სამოსამართლეო საქმიანობისთვის და მოსამართლის თანამდებობაზე განწესებისთვის არის საჭირო, ყველა კრიტერიუმი სასამართლოს მხრიდან არის გავლილი და ამის შესახებ ინფორმაცია, თუ დაცვის მხარეს აქვს ამის მაღალი ინტერესი, არსებობს.

სასამართლოს მიაჩნია, რომ ყველა ის საკითხი და არგუმენტი, რაზეც დაცვის მხარემ ყურადღება გაამახვილა არ გამომდინარეობს მოქმედი კანონმდებლობიდან გამომდინარე, შესაბამისად, დაცვის მხარის შუამდგომლობა აცილებასთან დაკავშირებით არ უნდა დაკმაყოფილდეს. აღნიშნული განჩინება ცალკე არ საჩივრდება, შეგიძლიათ გაასაჩივროთ შემაჯამებელ გადაწყვეტილებასთან ერთად“,- განაცხადა მოსამართლე ნინო სახელაშვილმა.

ცნობისთვის, ბათუმის საქალაქო სასამართლოში გამოცემა „ბათუმელებისა“ და „ნეტგაზეთის“ დამფუძნებლის მზია ამაღლობელის საქმის არსებითი განხილვა მიმდინარეობს. სხდომას თავად ბრალდებული მზია ამაღლობელიც ესწრება. გამოძიება „სისხლის სამართლის კოდექსის“ 353-ე მუხლს ედავება, რაც პოლიციელზე თავდასხმას გულისხმობს და 4-დან 7 წლამდე თავისუფლების აღკვეთას ითვალისწინებს.

შეგახსენებთ, რომ მზია ამაღლობელი, ბათუმში, პოლიციის მთავარ სამმართველოსთან აქციის დროს თავდაპირველად ადმინისტრაციული წესით დააკავეს, დაახლოებით ორ საათში გამოუშვეს. გათავისუფლებიდან რამდენიმე წუთში კი, ის სამმართველოსთან კვლავ დააკავეს.