საქართველოს სახალხო დამცველმა ლევან იოსელიანმა საქართველოს შეზღუდული შესაძლებლობის მქონე პირთა ქსელის გაერთიანებულ შეხვედრაში მიიღო მონაწილეობა, რომელზეც შშმ პირთა უფლებების დაცვისა და ადვოკატირებისათვის განსახორციელებელ ღონისძიებებზე ისაუბრეს. ამის შესახებ ინფორმაციას სახალხო დამცველის აპარატი ავრცელებს.

მათივე ცნობით, თავის გამოსვლაში საქართველოს სახალხო დამცველმა აპარატის მიერ შშმ პირთა უფლებების მიმართულებით გამოკვეთილი ძირითადი გამოწვევები მიმოიხილა. ისაუბრა გადაწყვეტილების მიღების პროცესში შშმ პირთა ჩართვის მნიშვნელობაზე, შშმ პირთა სტატისტიკის წარმოებისა და არჩევნებში დამოუკიდებლად მონაწილეობის პრობლემებზე; განსაკუთრებული ყურადღება გაამახვილა ფსიქიკური ჯანმრთელობის მქონე პირთა საჭიროებებზე.

„ხაზი გაუსვა ფიზიკური გარემოს, ინფორმაციისა და კომუნიკაციის მისაწვდომობის, ასევე, შშმ პირთა/ბავშვთა მიზნობრივი სარეაბილიტაციო პროგრამების, ინკლუზიური განათლების მიმართულებით არსებულ სისტემურ გამოწვევებს.

სახალხო დამცველი აქტიურად მუშაობს შშმ პირთა უფლებების დაცვის მიმართულებით, ახორციელებს მონიტორინგს, ატარებს კვლევებს, ინდივიდუალურ საქმისწარმოებას. გამოკვეთილ პრობლემებსა და მათ აღმოსაფხვრელად პასუხისმგებელი სახელმწიფო უწყებებისადმი შემუშავებულ რეკომენდაციებს სახალხო დამცველი ყოველწლიურ საპარლამენტო და სპეციალურ ანგარიშებში ასახავს“, - აღნიშნულია ინფორმაციაში.