ვერეს ხეობა და მიმდებარე ტერიტორია სამშენებლო ნარჩენების ნაგავსაყრელად იქცა - აი ასეთ გარემოში ცხოვრობს ქალაქი, იწამლება მოსახლეობა, უნადგურდება ჯანმრთელობა! პასუხი ვის უნდა მოვთხოვოთ? ქალაქის მერიას, რომელიც ისედაც საქმის კურსშია?- ამის შესახებ კოალიცია „ძლიერი საქართველოს“ წევრი, დეა მეტრეველი სოციალურ ქსელში გამოქვეყნებულ პოსტში წერს.

ასევე დეა მეტრეველი რამდენიმე ფოტოსაც აქვეყნებს, რომელიც მისი თქმით, ვერეს ხეობასა და მის მიმდებარე ტერიტორიაზე სამშენებლო ნაგვის დაყრას ეხება.

მისი თქმით, საბოლოოდ ტერიტორიაზე განთავსებული სამშენებლო ნარჩენები ხეობაში აღმოჩნდება, მიუხედავად იმისა, რომ მერიის სამსახურმა განუმარტა, რომ ნარჩენები ტერიტორიაზე გარკვეული დროით საწყობდება.

„ვერეს ხეობა და მიმდებარე ტერიტორია სამშენებლო ნარჩენების ნაგავსაყრელად იქცა.

უნივერსიტეტის ქუჩის და წყნეთის გზატკეცილის მონაკვეთებზე ხეობაში იყრება მიწის და სხვა მყარი და თხევადი მასალების ნარჩენები. განსაკუთრებით უცნაურია, მერიის მიერ წყნეთის გზატკეცილზე, ტყის მონაკვეთთან და დასახლებულ პუნქტთან, კერძო კომპანიისთვის დროებით გადაცემული ტერიტორია, სადაც, როგორც მერიის სამსახურმა გვითხრა, ასაწყობებენ სამშენებლო ნაგავს, ღამის საათებში მოაქვთ მძიმე ტექნიკით და, აი, ასე ყრიან, ვითომ დროებით (სავარაუდოდ ეტაპობრივად გადაუშვებენ ხეობაში). გვერდით მცხოვრებლების ინტერესებზე არავინ ზრუნავს, საშინელი ხმაური ღამის საათებში, მტვერი, სუნი, მძიმე მეტალებით დაბინძურებული ჰაერი. აი ასეთ გარემოში ცხოვრობს ქალაქი, იწამლება მოსახლეობა, უნადგურდება ჯანმრთელობა! პასუხი ვის უნდა მოვთხოვოთ? ქალაქის მერიას, რომელიც ისედაც საქმის კურსშია?“,- წერს დეა მეტრეველი.