ბიზნესმენ ირაკლი პაპიაშვილის ინფორმაციით, დიდი ოდენობით თანხის მართლსაწინააღმდეგო მითვისების ბრალდებით დაკავებული გიორგი ჩიკვაიძის ჯანმრთელობის მდგომარეობა მძიმეა.

როგორც პაპიაშვილი აღნიშნავს, გუშინ ადვოკატის წასვლის შემდეგ, მასთან შევიდა ორი პიროვნება და გაეცნენ როგორც ფსიქოლოგები. მათ კი მოშიმშილე პატიმარზე განახორციელეს ფსიქოლოგიური ზეწოლა.

„გუშინ გიორგი ჩიკვაიძე გლდანის ციხის კლინიკაში მოინახულა ადვოკატმა. ადვოკატის წამოსვლის შემდეგ, მასთან შევიდა ორი პიროვნება, გაეცნენ როგორც ფსიქოლოგები.

მათ მოშიმშილე პატიმარზე განახორციელეს ფსიქოლოგიური ზეწოლა.

მათი საუბრის თემა იყო მისი პოლიტიკური შეხედულებები, რაც არ წარმოადგენს პროფესიონალი ფსიქოლოგების საქმიანობის სფეროს.

ახლა, უკვე ყველაფერი გასაგებია, თუ რატომ არ გადაჰყავთ გიორგი მრავალპროფილურ კლინიკაში.

გიორგის ჯანმრთელობის მდგომარეობა კვლავ არის მძიმე, დიაგნოზი ამ ეტაპამდე არ გვაქვს და ის აგრძელებს შიმშილობას.

ინფორმაცია მოგვაწოდა სახალხო დამცველის აპარატის თანამშრომელმა, რომელმაც მოინახულა გიორგი.

ასევე ამ ფაქტთან დაკავშირებით მის მიერ შედგენილია ოქმი“,-წერს პაპიაშვილი.

ცნობისთვის, დიდი ოდენობით თანხის მართლსაწინააღმდეგო მითვისების ფაქტზე ბრალდებულ ბიზნესმენს, გიორგი ჩიკვაიძეს აღკვეთის ღონისძიების სახით შეფარდებული 50 000-ლარიანი გირაო პატიმრობით შეეცვალა. 11 მარტს გიორგი ჩიკვაიძე სასამართლოს სხდომათა დარბაზში დააკავეს. მასთან ერთად ბრალდებულია მისი მეგობარი ირაკლი პაპიაშვილიც, თუმცა, მას აღკვეთის ღონისძიების სახით 50 000-ლარიანი გირაო აქვს შეფარდებული. გიორგი ჩიკვაიძემ შიმშილობა 12 მარტს დაიწყო.