განცდა დაგვრჩა, რომ მოსამართლე თავიდანვე იყო გამოსული განწყობით, რომ დაცვის მხარის არცერთი შუამდგომლობა არ უნდა დაკმაყოფილებულიყო, - ამის შესახებ პარლამენტთან მიმდინარე აქციების დროს დაკავებულის, მსახიობ ანდრო ჭიჭინაძის ადვოკატმა თორნიკე მიგინეიშვილმა პროცესის დასრულების შემდეგ განაცხადა.

მისი თქმით, სასამართლო პროცესები არ არის სამართლებრივ ჩარჩოებში მოქცეული და დამყარებულია პოლიტიკურ მოტივაციებზე.

„ეს არ ეხება მხოლოდ მტკიცებულების ნაწილს, ეხება ხალხის დაშვების ნაწილს, მონიტორის სამსახური საშვების სამსახურს, სახალხო დამცველის წარმომადგენლის დაშვების საკითხს. ცალკე საკითხია დარღვეული მტკიცებულებები - მოპოვების სტანდარტი იყო დარღვეული. მიუხედავად ამისა, სასამართლომ ვერ დაინახა კანონდარღვევა. პროკურატურის ყველა მტკიცებულება დაუშვა, ჩვენ კი ამოგვირიცხა მნიშვნელოვანი მტკიცებულები, რომელიც არის ევროსაბჭოს და ევროსასამართლოს რეზოლუციები.

დღეს რა პროცესებიც მიმდინარეობს, არ არის სამართლებრივ ჩარჩოებში მოქცეული, გაცდენილია ჩარჩოებს და დამყარებულია პოლიტიკურ მოტივაციებზე.

ის რომ, 2 აპრილს ჩაინიშნა პროცესი, ისეთივე ფორმალურია, როგორი ფორმალური განხილვაც იყო დღეს“,- განაცხადა ადვოკატმა.