მიუნხენის გამოსვლიდან მომდევნო წელს პუტინი და მისი არმია საქართველოში შეიჭრნენ, უკრაინის შესახებ დაწერილი ესეს მომდევნო წელს ისინი უკრაინაში შეიჭრნენ, - ამის შესახებ აშშ-ის ჰელსინკის კომისიის თავმჯდომარემ, სენატორმა როჯერ უიკერმა (რესპუბლიკური პარტია) კონგრესში გამოსვლისას განაცხადა.
„2021 წელს პრეზიდენტმა პუტინმა ესე დაწერა, რომელშიც საფუძველს უყრიდა უკრაინაში მის შეჭრას. ეს იყო ბოლო შეჭრის წინა წელს. მასში ის უკრაინელი ხალხის, როგორც გამორჩეული და თვითმმართველი ერის არსებობის უფლებას უარყოფს.
ესე სავსეა ტყუილებით, ადოლფ ჰიტლერი იამაყებდა იმით. მაგრამ ის აჩვენებს, რომ ერთი რამ არის სწორი - ბატონი პუტინი ძირეულად რუსი იმპერიალისტია. ის ადამიანია, რომელსაც სჯერა, რომ ბოლო 40 წლის უდიდესი ისტორიული ტრაგედია საბჭოთა ძალისა და აღმოსავლეთ ევროპაზე გავლენის ჩამოშლა იყო.
პუტინი საჯაროდ აცხადებს თავისი სიდიადის ბოდვებს, მაგრამ ის სიტყვებზე და გამოსვლებზე არ ჩერდება. ის ნებისმიერ საჭირო ზომებს იყენებს, რათა ნატო-ს წინააღმდეგ თავისი ათწლეულების პოლიტიკური ომი გააგრძელოს, და ის დაუნდობლად მუშაობს, რათა მიაღწიოს თავის სასურველ იმპერიას.
თავისი მიუნხენის გამოსვლიდან მეორე წელს, ვლადიმირ პუტინი და მისი არმია შეიჭრნენ მეზობელ საქართველოს რესპუბლიკაში. უკრაინის შესახებ თავისი ესე-დან მეორე წელს, ისინი უკრაინაში შეიჭრნენ.
ბატონი პუტინი ტექნიკურად აღარ არის „კაგებეს“ თანამშრომელი, მაგრამ ის ჯერ კიდევ ფიქრობს როგორც „კაგებეს“ აგენტი. ისეთი, რომელიც ქიმიურ იარაღს იყენებს რუსეთში და მსოფლიოს გარშემო მცხოვრები ხალხის მოსაწამლად, შურს იძიებს თავის კრიტიკოსებზე საერთაშორისო საზღვრების გაუთვალისწინებლად. ის აპატიმრებს რეპორტიორებსა და აქტივისტებს. რატომ აკეთებს ამას? ვინაიდან დიქტატორები რეალურად თავისი ხალხის შიშში ცხოვრობენ“, - განაცხადა უიკერმა.
