კოალიცია „ძლიერი საქართველოს“ ცენტრალურ ოფისში პარტიის ლიდერები, რეგიონულ წარმომადგენლებთან სამუშაო შეხვედრას მართავენ.

სამუშაო შეხვედრაზე საქართველოს ყველა რეგიონიდან 100-მდე წარმომადგენელია, რომლებიც რეგიონში არსებულ პრობლემებზე, სამომავლო გეგმებსა და ახალი საპარლამენტო არჩევნების საკითხებზე იმსჯელებენ.

როგორც პარტიის ლიდერები აცხადებენ, მიუხედავად იმისა, რომ მმართველი პარტია კოალიციის ლიდერების წინააღმდეგ სამართლებრივ დევნას ახორციელებს და შეხვედრის პარალელურად საქალაქო სასამართლოში ბადრი ჯაფარიძის პროცესი მიმდინარეობს, პარტია მუშაობას კვლავ აქტიურად აგრძელებს.

პარტიის ლიდერის, მამუკა ხაზარაძის შეფასებით, სამუშაო შეხვედრაზე მთავარი განსახილველო საკითხი "ქართული ოცნების" ხელისუფლებიდან გაშვება იქნება.

„ჩვენ რეგიონის ლიდერებს ვხვდებით. პარტია იზრდება, ყალიბდება და ეს ყველაფერი ჩვენი პარტიისა და კოალიციის გაძლიერებას ემსახურება. ვემზადებით ახალი არჩევნებისთვის, რომელიც აუცილებლად იქნება დანიშნული. ყოველდღიურად მზაობაში ვართ, რომ პროტესტი გაძლიერდეს, რომ გათავისუფლდნენ პოლიტპატიმრები, რომ მოღალატეობრივი "ქართული ოცნება" გავუშვათ ხელისუფლებიდან.

ვაგრძელებთ შეხვედრებს როგორც რეგიონებში, ისე პარტიის ცენტრალურ ოფისში და ეს პროცესი გაგრძელდება",- განაცხადა მამუკა ხაზარაძემ.

ასევე, შეხვედრაზე აღინიშნა, რომ ბოლო პერიოდში პარტიის წევრების რაოდენობა რამდენჯერმე გაიზარდა, რაც პარტიის გაძლიერებაზე მიუთითებს.

„დღეს სამუშაო შეხვედრაზე წარმოდგენილები ვართ რეგიონის ლიდერები, ძალიან მნიშვნელოვანია ჩვენი პარტიული ზრდა, ყველა კარგად იაზრებს, რომ ახალ საპარლამენტო არჩევნებს უნდა მივაღწიოთ, ასევე უნდა გათავისუფლდნენ პოლიტპატიმრები და სამუდამოდ უნდა გავუშვათ "ქართული ოცნება" პოლიტიკურ სანაგვეზე",- განაცხადა ზუგდიდის ოფისის წარმომადგენელმა, სოფო შამუგიამ.