საქართველოს პრემიერ-მინისტრის, ირაკლი კობახიძის განცხადებით, მმართველ პარტიას აქვს ამბიცია, რომ თვითმმართველობის არჩევნებში 64-ვე მუნიციპალიტეტში გაიმარჯვოს.

როგორც კობახიძემ ჟურნალისტებს განუცხადა, ოპოზიცია მარცხისთვისაა განწირული, „ქართული ოცნების“ მოსალოდნელ გამარჯვებაზე კი კვლევები მეტყველებს.

„ჩვენთვის გარკვეულწილად შეიძლება საინტერესო იყოს ოპოზიციის მონაწილეობა თვითმმართველობის არჩევნებში, გამომდინარე იქიდან, რომ კიდევ უფრო მძიმედ დამარცხდებიან, ვიდრე საპრეზიდენტო არჩევნებში დამარცხდნენ. გვაქვს ამბიცია, რომ იმაზე მაღალი შედეგის მიღებაც შეგვიძლია, ვიდრე საპარლამენტო არჩევნებში მივიღეთ. დღევანდელი კვლევები ამაზე მიუთითებს, რის თანახმადაც, ჩვენი რეიტინგი კიდევ უფრო გაუმჯობესებულია. დანარჩენი არის ოპოზიციის საქმე. ასეც და ისეც, ოპოზიცია არის განწირული მძიმე მარცხისთვის 64-ვე მუნიციპალიტეტში. ჩვენ მოვიგებთ როგორც მერის, ასევე საკრებულოს არჩევნებს 64-ვე მუნიციპალიტეტში მთელი ქვეყნის მასშტაბით“, - განაცხადა კობახიძემ.