ტარიფებთან დაკავშირებით ჩინეთის მხრიდან ესკალაცია დიდი შეცდომაა, - ამის შესახებ აშშ-ის სახაზინო მდივანმა, სკოტ ბესენტმა განაცხადა.

„ვფიქრობ ჩინეთის მიერ ესკალაცია დიდი შეცდომა იყო. ჩვენ დეფიციტური ქვეყანა ვართ. რას ვკარგავთ ჩინეთის მიერ ჩვენს წინააღმდეგ ტარიფების მომატებით? ჩვენ მათთან იმის მეხუთედის ექსპორტს ვახორციელებთ, რასაც ისინი ჩვენთან. ასე რომ, ეს დანაკარგს მათთვის წარმოადგენს“, - განაცხადა სკოტ ბესენტმა.

მისი თქმით, სავაჭრო მოლაპარაკებებში აშშ-ის პრეზიდენტი, დონალდ ტრამპი პირადად მიიღებს მონაწილეობას.

ამასთან, კითხვაზე, უნდა შეამციროს თუ არა ევროკავშირმა არასატარიფო ბარიერები, მათ შორის დამატებითი ღირებულების გადასახადი, ბესენტმა უპასუხა, რომ „ყველაფერი განიხილება“.