საქართველოს პარლამენტის შენობის წინ, 9 აპრილის მემორიალთან, სასულიერო პირებმა 9 აპრილს დაღუპულთა სულის მოსახსენიებელი პარაკლისი გადაიხადეს და მათ ხსოვნას პატივი მიაგეს.

ამჟამად მოქალაქეები სიტყვით გამოდიან და 9 აპრილს იხსენებენ.

ამასთან, პარლამენტთან შეკრებილმა მოქალაქეებმა კიდევ ერთხელ გაიხსენეს ზვიად გამსახურდიას სიტყვები, რომელიც მან 1991 წლის 9 აპრილს წარმოთქვა: „სიმბოლურია საქართველოს დამოუკიდებლობის აღდგენის გამოცხადება 9 აპრილს, ვინაიდან ამ დღეს გადაწყდა საქართველოს ბედი. 9 აპრილის წამებულთა სულები დაგვცქერიან ჩვენ და ხარობენ ზეციურ ნათელში, რამეთუ აღსრულდა ნება მათი, აღსრულდა ნება ქართველი ერისა, გაუმარჯოს დამოუკიდებელ საქართველოს! გვფარავდეს ღმერთი!“. გარდა ამისა, პარლამენტთან გაჟღერდა საქართველოს ეროვნული ჰიმნი.

მოქალაქეები 9 აპრილის მემორიალთან დღეს დილიდან შეიკრიბნენ. მათ მემორიალთან ე.წ. ცოცხალი კედელი აღმართეს და საჯარო მოხელეებს არ აძლევდნენ საშუალებას, რომ მემორიალთან მისულიყვნენ. ისინი სკანდირებდნენ: "რუსებო, მონებო, წადით!”. პარლამენტთან სიტუაცია რამდენჯერმე დაიძაბა. ადგილზე მობილიზებულია პოლიცია.