თეთრი სახლი ადასტურებს, რომ ჩინეთის წინააღმდეგ ტარიფები უკვე 145%-მდეა გაზრდილი. ამის შესახებ ამერიკულ ტელეარხ CNBC-ის თეთრი სახლის მაღალჩინოსანმა დაუდასტურა.

ტელეარხის ცნობით, ჟურნალისტებმა აშშ-ის პრეზიდენტის, დონალდ ტრამპის განკარგულებები შეისწავლეს და ივარაუდეს, რომ ჩინეთის წინააღმდეგ შემოღებული ჯამური ტარიფები შესაძლოა 125%-ზე მეტი იყოს, ვინაიდან, მათ ტრამპის უფრო ადრინდელი 20%-იანი ტარიფის შესახებ განკარგულება აღმოაჩინეს, რომელიც მან “ფენტანილის გამო” შემოიღო.

თეთრი სახლის მაღალჩინოსანმა მათ დაუდასტურა, რომ ეს სწორი ინტერპრეტირებაა.

ცნობისთვის, ბოლო განკარგულებით ტრამპმა ჩინური იმპორტისთვის ტარიფები 84-დან 125%-მდე გაზარდა, ვინაიდან, ჩინეთმა საპასუხო ზომები შემოიღო. “ფენტანილთან დაკავშირებულ” 20%-იან ტარიფთან ერთად, რომელიც ტრამპმა აქამდე შემოიღო, ჩინეთზე დაწესებული ტარიფები 145%-ს შეადგენს.