ირანის საგარეო საქმეთა მინისტრი, აბას არაღჩი მიმდინარე კვირის ბოლოს რუსეთში ჩავა და ირანსა და შეერთებულ შტატებს შორის ომანში გამართულ მოლაპარაკებებთან დაკავშირებით მოსკოვთან კონსულტაციებს გამართავს, - Reuters-ის ინფორმაციით, ამის შესახებ ირანის საგარეო საქმეთა სამინისტროს პრესსპიკერმა, ესმაელ ბაღაეიმ განაცხადა.

მისი თქმით, ვიზიტი წინასწარ იყო დაგეგმილი, თუმცა აშშ-სთან მოლაპარაკებებთან დაკავშირებით კონსულტაციები გაიმართება.

ირანმა და აშშ-მა განაცხადეს, რომ გასულ კვირას ომანში პოზიტიური და კონსტრუქციული მოლაპარაკებები გამართეს და შეთანხმდნენ, რომ შაბათს კვლავ შეიკრიბებიან დიალოგის ფარგლებში, რომელიც თეირანის ბირთვული პროგრამის ესკალაციის საკითხს განიხილავს.

შეერთებული შტატები ირანს ბირთვული იარაღის შექმნის მცდელობაში ადანაშაულებს. თეირანი აცხადებს, რომ მისი ბირთვული პროგრამა მხოლოდ სამოქალაქო მიზნებს ემსახურება.

აშშ-ის პრეზიდენტი დონალდ ტრამპი სამხედრო მოქმედებებს არ გამორიცხავს, თუ ირანის ბირთვული პროგრამის შეჩერების შესახებ შეთანხმებას ვერ მიაღწევენ. მან გუშინ განაცხადა, რომ ის ირანის საკითხში მრჩევლებს შეხვდა და სწრაფ გადაწყვეტილებას ელოდება.