მეცნიერებათა ეროვნული აკადემიისა და სოფლის მეურნეობის მეცნიერებათა აკადემიის ნამდვილი წევრებისთვის, წევრ-კორესპონდენტებისა და სტიპენდიატებისთვის ანაზღაურების გაზრდას პარლამენტმა მხარი დაუჭირა. ამავე საკანონმდებლო ინიციატივის გათვალისწინებით, სოფლის მეურნეობის მეცნიერებათა აკადემიას წევრ-კორესპონდენტების არჩევის შესაძლებლობა მიეცემა.

კანონის პროექტი, 15 აპრილის სხდომაზე, პირველი მოსმენით - 81 ხმით მიიღეს. პროექტი განათლების, მეცნიერებისა და ახალგაზრდულ საქმეთა კომიტეტმა მოამზადა.

მოქმედი კანონით, მეცნიერებათა ეროვნული აკადემიის ნამდვილი წევრის მინიმალური ანაზღაურება განსაზღვრულია არანაკლებ 1 600 ლარის ოდენობით, ხოლო წევრ-კორესპონდენტისა და სტიპენდიატის - არანაკლებ 1000 ლარის ოდენობით. კანონში დაგეგმილი ცვლილების მიხედვით, მეცნიერებათა ეროვნული აკადემიის ნამდვილი წევრის ანაზღაურება არანაკლებ 2 000 ლარი იქნება, ხოლო წევრ-კორესპონდენტებისა და სტიპენდიატების - არანაკლებ 1 250 ლარი.

რაც შეეხება სოფლის მეურნეობის აკადემიას, აკადემიის ნამდვილი წევრის მინიმალური ანაზღაურება განსაზღვრულია არანაკლებ 1 450 ლარის ოდენობით, ხოლო წევრ-კორესპონდენტისა და სტიპენდიატის - არანაკლებ 900 ლარის ოდენობით. ცვლილების მიხედვით, ნამდვილი წევრის მინიმალური ანაზღაურება არანაკლებ 2 000 ლარი იქნება, ხოლო წევრ-კორესპონდენტისა და სტიპენდიატის არანაკლებ 1 250 ლარი.

ამდენად, სოფლის მეურნეობის მეცნიერებათა აკადემიის ნამდვილი წევრის, წევრ-კორესპონდენტისა და სტიპენდიატის მინიმალური ანაზღაურება მეცნიერებათა ეროვნული აკადემიის ნამდვილი წევრის, წევრ-კორესპონდენტისა და სტიპენდიატის ანაზღაურების მინიმალურ ოდენობას გაუთანაბრდება.