რუსებმა ხარკოვზე სარაკეტო შეტევა განახორციელეს, რის შედეგადაც, ბოლო მონაცემებით, ერთი ადამიანი დაიღუპა და 57 დაშავდა, - ინფორმაციას უკრაინული მედია ავრცელებს.

მათივე ინფორმაციით, დაშავებულებს შორის ორი ბავშვია.

ხარკოვის ოლქის სახელმწიფო ადმინისტრაციის ხელმძღვანელის, ოლეგ სინეგუბოვის თქმით, წინასწარი ინფორმაციით, რუსებმა ოსნოვიანსკის რაიონში მრავალბინიან საცხოვრებელი სახლები დაბომბეს.

„წინასწარი ინფორმაციით, ხარკოვზე დარტყმები კასეტური საბრძოლო მასალის მქონე ბალისტიკური რაკეტებით განხორციელდა. სწორედ ამიტომ, დაზარალებული ტერიტორიები ძალიან დიდია“, - განაცხადა ხარკოვის მერმა, იგორ ტერეხოვმა.

მისი თქმით, დარტყმის შედეგად 20-ზე მეტი საცხოვრებელი კორპუსი და 30-ზე მეტი კერძო სახლი დაზიანდა და შესაძლოა, ნანგრევების ქვეშ ადამიანები იმყოფებოდნენ.

ხარკოვის გარდა, რუსებმა დილით ქალაქ სუმსაც დაარტყეს. დაიღუპა ერთი და დაშავდა ერთი ადამიანი. უკრაინული მედიის ინფორმაციით, თავდასხმა „შაჰედის“ ტიპის დრონებით სამოქალაქო ინფრასტრუქტურის ობიექტზე განხორციელდა.