აშშ-ის პრეზიდენტის, დონალდ ტრამპის განცხადებით, ის მხარს უჭერს აშშ-ის თავდაცვის მინისტრს პიტ ჰეგსეთს, - ინფორმაციას Reuters-ი ავრცელებს.
გამოცემის ცნობით, ტრამპმა ეს განცხადება მას შემდეგ გააკეთა, რაც გავრცელდა ინფორმაცია, რომ პიტ ჰეგსეთმა იემენში ჰუსიტებზე განხორციელებული თავდასხმის დეტალები აპლიკაცია Signal-ის შეტყობინებების ჯგუფში გააზიარა, რომელშიც მისი მეუღლე, ძმა და პირადი ადვოკატი იყვნენ გაერთიანებული.
„პიტი შესანიშნავად ასრულებს თავის საქმეს. ყველა კმაყოფილია მისით“, - განაცხადა ტრამპმა. კითხვაზე, კვლავ ენდობა თუ არა ჰეგსეთს, ტრამპმა უპასუხა: „დიახ, აბსოლუტურად“.
ცნობისთვის, გამოცემა NPR-მა ამერიკელ ოფიციალურ პირზე დაყრდნობით გაავრცელა ინფორმაცია, რომ თეთრმა სახლმა, პენტაგონის ხელმძღვანელის, პიტ ჰეგსეთის გარშემო ატეხილი სკანდალის ფონზე, ახალი თავდაცვის მინისტრის ძებნა დაიწყო. თეთრი სახლის პრესსპიკერმა, კეროლაინ ლევიტმა NPR-ის სტატიას სრული ყალბი ამბავი უწოდა და განაცხადა, რომ გამოცემა ეყრდნობა ანონიმურ წყაროს, რომელსაც აშკარად წარმოდგენა არ აქვს, რაზეა საუბარი.
