თეოდორე აბრამოვისგან ბიოლოგიური მასალა პირადი ჩხრეკის პროცედურების დროს, მოტყუებით, მისი პირის ღრუდან აიღეს, თითქოს, ბრეკეტების ჩვენების მიზნით,- ამის შესახებ ნარკოდანაშაულში ბრალდებულ აბრამოვის ადვოკატმა ინგა ჯაბანიშვილმა განაცხადა.

აღნიშნული მან პროკურატურის მიერ წარმოდგენილ მტკიცებულებასთან, ექსპერტიზის დასკვნასთან დაკავშირებით განაცხადა, რომლის მიხედვითაც, ნარკოტიკის შესაფუთ მასალაზე აბრამოვის ბიოლოგიური კვალი ამოვიდა.

„ჩვენ თავიდანვე ვაფიქსირებდით იმ პოზიციას, რომ თედორე აბრამოვისგან საკვლევი მასალა, ნარკოტიკული საშუალება და შესახვევი მასალა კანონდარღვევით არის ამოღებული, ანუ პირადი ჩხრეკაა კანონდარღვევით ჩატარებული, რადგან საფუძველი არ არსებობდა. ეს ნარკოტიკული საშუალება თედორე აბრამოვს არ ეკუთვნოდა, მისი ჯიბიდან არ ამოუღიათ, ის თან ჰქონდა პოლიციას. თავიდანვე ვაფიქსირებდით, რომ აბრამოვისგან ბიოლოგიური მასალა პირადი ჩხრეკის პროცედურების დროს, მოტყუებით, მისი პირის ღრუდან, თითქოს, ბრეკეტების ჩვენების მიზნით. შესაბამისად, ჩვენ ეს მოლოდინი გვქონდა, რომ აღნიშნული დასკვნა ასეთი მოვიდოდა. თუმცა, საგულისხმოა, რომ აღნიშნულ ბიოლოგიურ მასალაზე კიდევ სხვა პროფილებიც ამოვიდა, რაც ჩვენს ვარაუდს ამყარებს, რომ ნარკოტიკული საშუალება და შესახვევი მასალა სამართალდამცავების ხელში იყო ყოველგვარი დალუქვის გარეშე, რაც მისი შეცვლის, გადატანის საფუძველს იძლევა“, - განაცხადა ჯაბანიშვილმა.

ცნობისთვის, თედო აბრამოვი სამართალდამცავებმა 7 დეკემბერს დააკავეს.

თედო აბრამოვს ბრალდება სისხლის სამართლის კოდექსის 260-ე მუხლის მე-6 ნაწილით მიმდინარეობს, რაც განსაკუთრებით დიდი ოდენობით ნარკოტიკული საშუალების შეძენა, შენახვა ტარებას გულისხმობს.

ბრალის მიხედვით აბრამოვის პირადი ჩხრეკისას სამართალდამცავებმა ნარკოტიკული საშუალება 5 გრამამდე "მდმა" ამოიღეს.

აღნიშნული ქმედება 8-დან 20 წლამდე ან უვადო თავისუფლების აღკვეთას ითვალისწინებს.