თბილისის საქალაქო სასამართლოში, სადაც „კოალიცია ცვლილებისთვის“ წევრის, პოლიციელ მირიან ქავთარაძეზე თავდასხმაში ბრალდებულ საბა სხვიტარიძის სასამართლო პროცესი უნდა გაიმართოს, ხმაურია.
აღნიშნულის მიზეზი ბრალდებულების ახლობლებისა და ოჯახის წევრების უკმაყოფილებაა, რომლებიც დარბაზის შეცვლას ითხოვენ. კერძოდ კი, მათი თქმით, სხდომათა დარბაზში დიდი ოდენობით არიან სამართალდამცავები წარმოდგენილი, რის გამოც, პროცესზე დასწრება ოჯახის წევრებს დარბაზის სიმცირიდან გამომდინარე არ შეუძლიათ.
დღევანდელ სხდომაზე საქმის გამომძიებელი, სალომე ედიშერაშვილი დაიკითხება.
ცნობისთვის, საბა სხვიტარიძეს ბრალდება სისხლის სამართლის კოდექსის 353-ე პრიმა მუხლის მეორე ნაწილით აქვს წარდგენილი, რაც პოლიციელის ჯანმრთელობის ხელყოფას სამსახურებრივ საქმიანობასთან დაკავშირებით გულისხმობს.
სახელმწიფო ბრალდების განმარტებით, სხვიტარიძის ქმედების შედეგად სამართალდამცავმა, თბილისის მთავარი სამმართველოს ერთ-ერთი სამმართველოს უფროსმა, მირიან ქავთარაძემ ფიზიკური დაზიანება მიიღო, კერძოდ კი, მას თავი ჰქონდა გატეხილი.
აღნიშნული ქმედება სასჯელის სახედ და ზომად 7-დან 11 წლამდე თავისუფლების აღკვეთას ითვალისწინებს.
ამასთან, საქმეში დაზარალებულის სტატუსი აქვს საბა სხვიტარიძეს. ის სამართალდამცავების მხრიდან დაკავების შემდეგ ფიზიკური და ფსიქოლოგიური ძალადობის რამდენიმე ეტაპზე საუბრობს.
