მზია ამაღლობელი - მოძალადეს ბოდიშს არ უხდიან, ეს მინდა, იცოდეთ ჩემი განწყობის დასადგენად - ყველაფერს გავაკეთებ ევროინტეგრაციისა და გამოხატვის თავისუფლებისთვის, ეს თუ არის დანაშაული, ალბათ, უნდა დამაკავონ
მოძალადეს ბოდიშს არ უხდიან, ეს მინდა იცოდეთ ჩემი განწყობის დასადგენად, -ამის შესახებ „ნეტგაზეთისა“ და „ბათუმელების“ დამფუძნებელმა სასამართლო სხდომაზე განაცხადა.
ამაღლობელის თქმით, ის ბუნებით კრიმინალი არ არის და რაც კრიმინალთან არის დაკავშირებული სძულს.
მისივე განცხადებით, მან ზუსტად იცის, პატიმრობაში არ ყოფნის შემთხვევაში რას გააკეთებს - დანაშაულს არ ჩაიდენს.
„რაც შეეხება ახალი დანაშაულის ჩადენის რისკს, სიმართლე გითხრათ, პირველი დღიდან, როცა ეს გაჟღერდა ვერ ვხვდები, რას ნიშნავს დანაშაულის ჩადენა, იმიტომ, რომ ბუნებით კრიმინალი არ ვარ და ყველაფერი, რაც კრიმინალთან არის დაკავშირებული მძაგს, ატანა არ მაქვს. ახალი დანაშაული თუ უნდა ჩაიდინო, უნდა დაგეგმო ხომ ან თუ ახალი დანაშაულის ჩადენა შემიძლია, საპატიმროში რატომ არ შემიძლია?!
ერთადერთი ვიცი, რომ პატიმრობაში თუ არ ვიქნები, ზუსტად ვიცი რას გავაკეთებ, დანაშაულს არ ჩავიდენ, იმიტომ, რომ არ ვარ კრიმინალი, მაგრამ ყველაფერს გავაკეთებ ქვეყნის ევროინტეგრაციისა და გამოხატვის თავისუფლებისთვის, ეს თუ არის დანაშაული, მაშინ ალბათ, უნდა დამაკავონ. ევროინტეგრაციისთვის და სიტყვისა და გამოხატვის თავისუფლებისთვის ყველაფერს გავაკეთებ", - განაცხადა ამაღლობელმა.
v-if="article.gallery" v-html="article.gallery"
