სააპელაციო სასამართლომ გიორგი ოკმელაშვილის მიმართ საქალაქო სასამართლოს განაჩენი - 5 წლით თავისუფლების აღკვეთა ძალაში დატოვა
სააპელაციო სასამართლომ „უცხოური გავლენის გამჭვირვალობის შესახებ“ კანონპროექტის საწინააღმდეგო აქციაზე პოლიციელზე თავდასხმის საქმეზე მსჯავრდებულ გიორგი ოკმელაშვილის საქალაქო სასამართლოს გადაწყვეტილება - ხუთი წლით თავისუფლების აღკვეთა ძალაში დატოვა.
დაცვის მხარე თბილისის საქალაქო სასამართლოს განაჩენის გაუქმებასა და გიორგი ოკმელაშვილის უდანაშაულოდ ცნობას მოითხოვდა.
ადვოკატი კობა ბარამია აცხადებს, რომ საქმე ზემდგომ ინსტანციაში გასაჩივრდება, რის შემდეგაც სტრასბურგის სასამართლოს მიმართავენ.
გამოძიების ინფორმაციით, 13 მაისს, პარლამენტის მიმდებარე ტერიტორიაზე გამართულ საპროტესტო აქციაზე გიორგი ოკმელაშვილმა შინაგან საქმეთა სამინისტროს თანამშრომელს ალექსანდრე ოხანაშვილს ფიზიკური შეურაცხყოფა, კერძოდ, იდაყვის დარტყმით სახის არეში დაზიანებები მიაყენა.
ოკმელაშვილს ბრალი სისხლის სამართლის კოდექსის 353-ე პრიმა მუხლის პირველი ნაწილით წარედგინა, რაც სამსახურებრივი საქმიანობის შესრულების დროს პოლიციელზე თავდასხმას გულისხმობს.
მას ასევე ბრალი სსკ-ის 260-ე მუხლის პირველი ნაწილითაც ჰქონდა წარდგენილი, რაც ნარკოტიკული საშუალებების უკანონო შეძენა-შენახვას გულისხმობს. თუმცა, მუხლი სრულად ამნისტირებულია, შესაბამისად, სისხლის სამართლებრივი დევნა ამ მუხლით შეწყდა.
დაკავებული გიორგი ოკმელაშვილი სარეკლამო კომპანია "ლიმონის" დამფუძნებელია.
v-if="article.gallery" v-html="article.gallery"
