უნგრეთისა და სლოვაკეთის პრემიერ-მინისტრების, ვიქტორ ორბანისა და რობერტ ფიცოს განცხადებით, ევროკავშირის გადაწყვეტილებების მიღებისას ერთსულოვნების წესის შეცვლა მიუღებელია.

მედიის ინფორმაციით, ეს განცხადება პრემიერებმა ბრატისლავაში გამართულ შეხვედრაზე განაცხადეს.

ორბანმა განაცხადა, რომ ევროკავშირის საგარეო პოლიტიკის საკითხებში ერთსულოვნებაზე უარის თქმა, ფაქტობრივად, ამ სახელმწიფოებისთვის სუვერენიტეტის წართმევას ნიშნავს.

„წარმოიდგინეთ, რომ საგარეო პოლიტიკის საკითხებში ერთსულოვნება სავალდებულო არ არის. თუ ზოგიერთი წევრი სახელმწიფო ვერ შეძლებს საკუთარი ინტერესების წარმოდგენას, შესაძლოა ომში ჩაგვითრიონ“, - განაცხადა უნგრეთის პრემიერ-მინისტრმა.

ფიცომ, თავის მხრივ, განაცხადა, რომ ვეტოს უფლების გაუქმება ევროკავშირის გაუქმებისკენ გადადგმული ნაბიჯია.

„ნუ გადადგამთ ნაბიჯებს, რამაც შეიძლება ევროკავშირის დანგრევა გამოიწვიოს“, - განაცხადა ფიცომ.