რუსეთს შეუძლია სამშვიდობო მოლაპარაკებებისთვის მზადყოფნა დაადასტუროს და სულ მცირე, 30 დღით ცეცხლის შეწყვეტას დათანხმდეს, - ამის შესახებ უკრაინის საგარეო საქმეთა მინისტრი, ანდრეი სიბიგა სოციალურ პლატფორმა X-ზე წერს.

„უკრაინა კიდევ ერთხელ ადასტურებს ნებისმიერ ფორმატში მშვიდობიანი მოლაპარაკებებისთვის მზადყოფნას, როგორც კი დავინახავთ, რომ რუსეთი ნამდვილად მზადაა მშვიდობისკენ მიმავალი რთული გზის გასავლელად და არა მხოლოდ მშვიდობის შესახებ პოპულიზმისთვის ან 9 მაისის აღლუმთან დაკავშირებით ხანმოკლე პროპაგანდისტული ცეცხლის შეწყვეტისთვის“, - წერს ანდრეი სიბიგა.

მისი თქმით, „თუ რუსეთი მზადაა 60 ან 90-დღიანი ცეცხლის შეწყვეტისთვის, მაშინ უკრაინაც მზად არის“.

„რუსეთმა მშვიდობისთვის მზადყოფნის შესახებ საუბარი უნდა შეწყვიტოს და დაიწყოს მოქმედება რეალურ და ხანგრძლივ ცეცხლის შეწყვეტაზე უპირობო თანხმობით“, - აღნიშნა უკრაინის საგარეო საქმეთა მინისტრმა.